“Add TECH into your TEaCHing” – Entrevista cu graduado di IPA, Christiane Augusto den cuadro di ‘Get to know IPA’


“E aña escolar cu a caba di pasa a mustra hopi di nos con importante ta di tin habilidad basico pa por traha cu herment moderno cu tin online.”

Esaki ta expresion di Christiane Augusto cu recientemente a gradua di e Estudio pa Maestro di Enseñansa Primario, specialidad 6 pa 12 aña, cu Instituto Pedagogico Arubano (IPA) ta ofrece.

Christiane su interes den tecnologia y diferente aplicacion educativo ta grandi. Durante su trayectoria na IPA semper e tabata busca diferente herment y idea riba internet pa por combina esakinan cu e metodonan existente p’asina haci su lesnan mas atractivo y interactivo pa e muchanan na su scol di practica. Segun Christiane, door di incorpora tecnologia den les, ya caba bo ta un poco mas cerca di e mundo sensorial di e mucha. E ta opina cu tecnologia ta un bon instrumento pa yuda un docente haci un splicacion mas visual pa e muchanan, y e por yuda amplia e conocemento riba cierto topico. Uzo di medio audiovisual por haci un les mas atractivo y moderno, tabata un di su comentarionan cu a resalta. Tambe esaki por yuda pa e muchanan tin mas interes y atencion pa les. Tin tecnologia cu ta haci posibel pa e lesnan ta te hasta interactivo, cual ta yuda pa e muchanan ta mas activo y atento durante les.

Christiane ta incorpora tecnologia den su lesnan door di uza diferente herment: “Hopi biaha mi ta mustra un video tocante un topico, cu mi lo bay siña e muchanan durante les, esey ta haci cu ya caba mi a haya nan atencion pa e tema cu nos lo bay trata. Mi sa graba video di mi mes tambe, caminda mi ta splica of mustra algo. Alabes mi ta haci uzo di e programa Ipevo, cual ta haci posibel cu mi por proyecta e mesun werkblad, cu e muchanan tin nan dilanti, riba un screen. Esey ta haci cu e muchanan ta sigui e les hopi mas miho. Mi ta traha QR-codes cu e muchanan por scan y yega na e materiaal of tarea cu ta online mas lihe.”

Christiane ta un persona hopi curioso y entusiasma, principalmente pa loke ta trata tecnologia. Pa e motibo aki, el a dicidi di no mantene e conocemento y habilidad cu el a adkiri pa su mes, pero pa comparti esaki cu tur maestro na Aruba: “Mi a crea un pagina riba facebook p’asina inspira y motiva otro maestro pa nan tambe ta innovativo y uza diferente herment online pa haci e lesnan mas moderno, atractivo y interactivo. Riba e pagina mi kier comparti idea con mi ta haci uzo di tecnologia durante les y update e maestronan ora tin algo nobo y atractivo cu nos por haci uzo di dje.” Pa den futuro Christiane tin mas idea planea pa su pagina di facebook: “Hopi biaha mi coleganan sa puntra mi cua website of app mi ta uza, of con ta traha cu cierto app. Pa e motibo aki mi lo kier graba den futuro algun video cortico na Papiamento, pa mustra y duna tip tocante e appnan y website. Pa mantene bo mes na altura di tur e desaroynan di Christiane su pagina di facebook, like e page ‘Juf Christi’. Tambe por sigui instagram/juf.christi.

Por ultimo Christiane ta termina cu un conseho pa tur maestro: “Purba combina diferente herment moderno y online hunto cu e manera tradicional di duna les. No ta facil, pero si bo purba bo por logra maske ta un tiki. Pone meta chikito, por ehempel pa duna 1 les pa siman combina cu tecnologia y despues bo por sigui amplia esaki.”

IPA ta invita comunidad di Aruba, specialmente tur studiante di havo, vwo y mbo nivel 4, maestro y tur otro persona interesa pa cuminsa un estudio of curso na IPA pa ‘like’ e page di Facebook Instituto Pedagogico Arubano, p’asina bo keda na altura di tur informacion di ‘Get to know IPA’.

Pa mas informacion por bishita nos website www.ipaaruba.com of pagina di Facebook ‘Instituto Pedagogico Arubano’ y si ainda bo tin cualkier pregunta, por tuma contacto cu Studenten Services na 5243100.


Leave a Comment