Zanillya, un artista internacional cu raiznan Arubiano, lo ta sacando su prome EP na ingles, bou di e nomber Electricity and Drums, riba dialuna, 4 di augustus. E prome single di e EP, ‘Raise Ya Flag,’ a caba di wordo lansa na un seleccion di radio emisora riba su isla di Aruba.
Tur e canticanan riba e EP a wordo skirbi pa Zanillya y produci pa THEprinceOFbeatz, cu kende Zanillya tin un relacion serca di trabou ya pa 4 aña.
Zanillya ta revela cu, como un artista contemporaneo, el a cambia pa canta den e idioma di Ingles na 2013, y desde e tempo ey e ta trahando riba mas di 50 cancion, buscando su sonido autentico nobo. Na final di un periodo largo di experimentacion y creatividad, e ta orguyoso di por presenta su musica nobo y kende e ta awendia.
Basa na Rotterdam, Zanillya a nace na Hannover, Alemania, yiu di un tata Arubiano y un mama di Macedonia. El a hereda su amor pa musica for di su mama artistico y un tata musical, tambe conoci como e defunto Bobby Farrell for di e mega grupo di vocalista di e añanan 70 y 80, Boney M.
Zanillya a cuminsa capta e atencion di e mundo musical na 2011, cual a resulta den un nominacion pa e premio di “Rookie of the Year State Award,” y el a bira e prome MC femenino pa gana e competencia mas grandi di presentacion en bibo na Hulanda, esta “De Grote Prijs van Nederland,” den e categoria di Miho Hip Hop.
Desde e tempo ey el a presenta na Noorderslag Eurosonic y tabata un invitado di e programa di television ‘De wereld draait door.’ Tambe el a bishita Giel Beelen na radio emisora 3FM y a wordo escohi pa e revista FHM como un di e 500 hende muhenan mas bunita na Hulanda. Recientemente el a firma un acuerdo di publicacion cu Imagam Music.
Cambiando constantemente y re-inventando su estilo, Zanillya ta uza su interesnan den un area amplio di genero pa crea loke e ta yama ‘Grunge Caribense.’ Su canticanan orienta riba baho cu influencianan tropical, ta combina dancehall, electronica, lo-fi y hip-hop na un manera fresco, y cu e actitud di grunge, cual tambe e ta yama New Era Pop.
Ademas di su presentacionnan y grabacionnan, Zanillya actualmente ta un studiante na e Fontys School of Arts, Rock Academy, unda e ta sigui desaroya su talentonan y habilidadnan personal. E lo gradua na 2015 cu un diploma di Bachelor of Music y ta contento di por mira dilanti riba hopi proyecto nobo cu e kier cuminsa.
E single Raise ya Flag ta e prome cancion di Electricity & Drums cu e ta sacando. E cancion ta enfoca riba un hende muhe cu ta kere den su mes, ta orguyoso y independiente bou di tur circunstancia, disfrutando di e aventura di bida y tur e momentonan positivo y negativo cu esaki ta trece cune! Champion, e di dos single, ta rindi tributo na e forsa interno di hende muhe.
Como un artista, Zanillya ta presenta un show fuerte en bibo, cu un DJ sampler en bibo, instrumento di hoorn y mas acompañante, accentua pa humor y sin cualkier restriccion, limitacion of regla, djis un ambiente dibertido y anima cu un energia hubenil! Mientras cu e ta balora e balor di entretenimento di su musica, e ta spera tambe di por inspira hende muhenan hoben pa ta exitoso y habri nan halanan.
E nomber di su EP ta sugeri su receta secreto, su nivel di energia electrico combina cu e ritmo di drum, e beat di su bida, combina hunto door di e productor musical.
More Posts for Show: The Morning Show
