Yrausquin a inaugura showroom nobo di Ford y Lincoln


Diasabra anochi famia Yrausquin a inaugura oficialmente e showroom renoba pa e

marcanan Ford y Lincoln. Cu famia Yrausquin ta referi na e di tres generacion di gerencia, pero tambe

empleado, clientenan y relacionnan comercial di e empresa local. Di e manera aki, Yrausquin ta clausura

un renobacion total di su sede na L.G. Smith Boulevard.

E anochi a conta cu presencia special di Sr. Carlos Reyes, ‘Regional Operation Manager’ di Ford y Lincoln

den Caribe. Reyes a tuma oportunidad di e ocasion special aki pa haci entrega di plakkaat ‘Golden

Shovel’ den nomber di Ford Motor Company reconociendo Yrausquin como un centro di servicio di clase

halto.

Director di Yrausquin, Ruben Yrausquin a hiba palabra poniendo enfasis riba e pilarnan cu ta carga e

historia, trayectoria y reputacion comercial prestigioso cu Yrausquin ta goza di dje ya pa mas di seis

decada cu ta: Famia, Pasion y Surpasa Expectativa.

“E concepto di famia ta bay mas leu cu e generacion tras generacion di vision y trabou duro… Pa nos, tur

empleado y cliente tambe ta forma parti di e famia cu ta Yrausquin. Yrausquin ta hopi dichoso di conta

cu coleganan cu ta comparti e mesun balornan. Nan ta traha schouder cu schouder pa nos yega na nos

obhetivonan,” asina Yrausquin a indica.

Un obhetivo alcansa ta e prome showroom di Lincoln na Aruba caminda por admira e modelo renoba di

Lincoln MKX. E mesun anochi aki, esnan presente por a conoce e modelonan mas nobo di Ford Edge,

mescos cu e Ford Explorer, Ford Everest, Ford Ranger y tambe Ford F150. E espacio di exhibicion mescos

cu otro areanan di e agencia di auto a keda optimalisa na beneficio di clientenan.

E manera aki di brinda servicio ta crea un lazo di confianza y lealtad cu ta surpasa tempo. Mescos cu e

negoshi a pasa di un generacion pa otro; Yrausquin tin cliente cu nan yiu y nietonan tambe a keda

sostene e compania. Nan ta reconoce e pasion cu ta biba den e operacion di e compania tur dia y den

tur loke Yrausquin ta haci. Esaki ta exactamente loke a haci e compania merecedor di e ‘Golden Shovel

Award’ for di Ford Motor Company.