Yamada na Artista y Profesionalnan di Museo

E Asociacion di Museonan di Caribe (MAC) ta organisando un exposicion virtual titula C(Collecting) O(our) V (Voices) I (in) the Caribbean and D(Diaspora), COVID. Pa e exposicion aki ta haci un yamada na artistanan pa entrega obra cu nan a produci durante e pandemia y ta invita profesionalnan di museo pa graba un video contando nan experiencia personal den e pandemia. Artista y profesionalnan di museo por haya mas informacion y manda nan material via di e siguiente linknan: https://caribbeanmuseums.com/call-for-artists/ https://caribbeanmuseums.com/call-for-testimonials/ E ultimo fecha pa manda e material ta dia 30 di november venidero, pues ta encurasha tur pa prepara nan trabou y testimonio y manda esaki mas pronto posibel. E pandemia di COVID-19 a afecta e region di Caribe particularmente duro, ya cu paisnan ta depende casi den totalidad di entradanan di turismo. E sector di arte, museo, herencia cultural y natural tambe ta wordo afecta pa caida den entrada y falta di fondo. Notable ta cu e sector aki ta desaroya formanan creativo, no solamente pa sigura nan sobrevivencia pero tambe pa stimula resiliencia den nan comunidadnan. MAC a bin ta organisando varios actividad durante e ultimo lunanan aki pa nan miembronan y henter sector di museo y cultural di Caribe. Asina a organisa un serie di panel (virtual) den diferente idioma di Caribe, na cual institucionannan di Caribe Hulandes tambe a participa recientemente. Fundacion 1403 ta miembro activo di MAC desde 2016, a forma parti die directiva den pasado y actualmente ta sostene e actividadnan di e Comite di Respuesta Ayudo di Emergencia di COVID di e asociacion.