“World Kidney Day”- Dia Mundial di riñon

Fundacion Kidneys297 ta conscientisa comunidad riba importancia di riñon

ORANJESTAD, Aruba – 24 di Februari 2014: Fundacion Kidneys297 ta e fundacion na Aruba cu tin como meta conscientisa nos comunidad tocante e factornan di riesgo cu lo por conduci na problema di riñon y promove deteccion tempran di e condicion aki. Tur aña riba e di dos diahuebs di Maart ta wordo celebra Dia Mundial di Riñon. E dia aki ta enfoca pa crea conscientisacion tocante e importancia di cuido di nos riñon pa cu nos salud en general.

Pa e motibo aki Kidneys297 tambe kier pone enfasis riba Dia Mundial di Riñon y kier haci esaki door di comparti informacion importante tocante e organo aki cu ta nos riñon.

Importancia di riñon Casi tur ser humano ta nace cu 2 riñon saludabel. Cada riñon tin e grandura di un mokete y ta situa bou di e ribchinan, uno cada banda di e weso di lomba. Un funcion importante di e riñon ta pa saca sushi di e curpa humano. Esaki ta sosode via di orina.

Malesa di riñon ta conoci como “e asesino silencioso” ya cu mayoria persona no ta experiencia sintomanan te ora cu ya e dañonan a ser haci na nan riñon caba. Malesa di riñon ta un di e condicionnan menos comenta na Aruba. Esaki ta e motibo pakico conscientisacion riba e condicion aki ta di suma importancia.

Con bo sa si bo ta core risico? Presion halto y diabetes ta e causanan mas comun di problema di riñon, pues bo tin risico di sufri di problema di riñon si den bo famia tin personanan cu ta sufri di e condicion aki.

Pa evita malesa di Riñon Fundacion Kidneys297 ta conseha comunidad pa: Haci un saminacion regularmente na bo dokter di cas; Controla e cantidad di salo cu bo ta tuma; Bebe 2L di awa diariamente; Haci ehercicio frecuentemente; Educa bo mes tocante malesanan hereditario manera presion halto, diabetes y problema di riñon.

Buki y caminata Den cuadro di Dia Mundial di Riñon Kidneys297 lo bay tin un buki informativo na benta. Esaki lo ta obtenibel na libreria De Wit & Van Dorp pa un suma di 10 florin. Den e buki aki tin informacion tocante entre otro problema di riñon, dialisis y hopi mas.

Banda di esaki Kidneys297 lo ta organisando un caminata cu lo tuma luga diadomingo 8 di Juni 2014 riba e ruta di Fishermans Hut (5km) cuminsando for di 5.30 pm. Carchi lo ta na balor di 5 florin.

Keda pendiente mirando cu den transcurso di e lunanan aki Kidneys297 lo bay ta informando mas tocante e caminata di conscientisacion aki.