WORKSHOP 2

Workshop conta storia na biblioteca


Biblioteca Nacional Aruba ta ofrece un workshop Conta storia. Esaki lo wordo duna na biblioteca na playa dor di docente y escritor di buki pa mucha, sra. Alida Kock. E workshop ta cuminsa dia 22 di oktober y tin 6 sesion. E workshop ta pa persona cu kier profundisa den e arte di conta storia. Idioma di instruccion ta Papiamento. Alida Kock a yega di participa na Festival di buki pa mucha como escritor y contador di storia. Alida Kock a studia ‘Spaanse taal en letterkunde’ na Hulanda y ta trahando como coordinador di e HBO master talen di UOC na Aruba. E tin entre otro 2 buki pa mucha riba su nomber ‘Yuuwaanaa’ (2006) y Cacho di rasa ( 2007) tur dos ta buki na dos idioma, Hulandes y Papiamentu cu a keda publica pa La Kock Publishing, un cas editorial cu Alida a lanta na 2005. Alida Kock pa hopi aña ta miembro di Stichting Simia Literario na Hulanda y e ta un miembro activo di fundacion Bon Nochi Drumi Dushi. E cursistanan lo tende hopi cuenta di diferente cultura durante e workshop. Nan ta siña e principio di contamento di storia caminda ta tene cuenta cu formanan di expresion. Ta usa recursonan manera dibuho, un paña di cuenta, popchi y otro atributonan cu ta yuda corda un cuenta. Ademas ta dedica atencion na rima, cantamento y baile pa duna un cuenta mas color.