Universidad di Aruba conhuntamente cu Wikipedia y Unesco Hulanda ta organisa un curso con pa contribui na e online encyclopedia di Wikipedia riba dia 29 y 30 di April. Wikipedia no ta ofrece suficiente articulonan tocante e parti Caribense di Reino Hulandes. Specialmente tin un falta di articulonan tocante temanan manera cultura, idioma, herencia, historia, pero tambe enseñansa, arte, media y sciencia social et cetera. Tambe, hopi di e informacion existente no a worde traha door di autornan local cu un perspectiva Caribense.
Pa e motibo aki Wikipedia y Unesco Hulanda a tuma iniciativa pa organisa cursonan na Aruba, Bonaire, Corsow y tambe na Hulanda pa professionalnan Caribense. Meta di e proyecto Wikipedia Goes Caribbean ta pa train autornan local cu por yuda yena e buraconan di Wikipedia. Durante dos workshop, tres trainer ta siña e participantenan con pa scirbi articulonan y upload nan riba Wikipedia. Tambe tin atencion con pa contribui cu potretnan na Wikimedia y Wiki Commons. E training no ta solamente pa fortalece Wikipedia Hulandes, pero tambe Wikipedia Ingles of Wikipedia na Papiamento. E training ta tuma lugar riba dia 29 y 30 di April na edificio Apex di Universidad na L.G. Smith Boulevard. Orario ta entre 3’or y 5’or di atardi. Participantenan ta wordo pidi pa bin cu laptop. No tin gasto y por registra via email: luc.alofs@ua.aw.
Despues di e training, Universidad di Aruba y Wikipedia ta presenta un lectura tocante Wikipedia goes Caribbean na aula di Universidad di Aruba riba dia di 30 april, entre 7’or y 9’or di anochi. E oradornan ta specialistanan di Wikipedia: Daniëlle Jansen, Michelle van Lanschot en Denise Jansen. E idioma lo ta Hulandes y Ingles. E lectura tambe ta gratis. Publico di Aruba ta wordo invita cordialmente.