vakantie kamp

Vakantie Kamp organisa pa IBiSA ta start 7 di JULI


Temporada di aña escolar ta yegando su final y ya caba Instituto Biba Saludabel y Activo, IBiSA tin su programa di vacacion cla pa ofrece na nos muchanan. E ‘vakantie kamp’ cu anualmente ta wordo organisa den luna di juli ta tuma lugar na tres localidad, cu ta San Nicolas, Sta. Cruz y Noord. Inscripcion pa participantenan na e ‘vakantie kamp’ a habri y ta posibel pa inscribi te cu dia 4 di juli 2014. E ‘vakantie kamp’ ta un actividad cu ta wordo organisa door di Ministerio di Deporte, ASU y IBiSA. Por inscribi na: Sport Center San Nicolas for di 8’or di mainta te cu 7’or di anochi. Tambe ta tuma inscripcion na Centro Deportivo Libertador Betico Croes (Sporthal) na Sta. Cruz, for di 8’or di mainta te cu 4’or di atardi. Y oficina di IBiSA situa na Frankrijkstraat 1 tambe ta habri pa inscripcion for di 8’or di mainta pa 4’or di atardi. Un mayor of voogd di e mucha mester pasa personalmente pa inscribi, pa cual ta pidi un copia di carchi di AZV di e mucha y e pago na momento di inscripicon. Costo di participacion na e ‘vakantie kamp’ ta Afl. 25,- pa 1 mucha. Pa 2 mucha di e mesun famia e ta bira Afl. 40,-. Mientras cu pa 3 mucha (yiu) di e mesun famia e participacion ta Afl. 60,-. E costo di participacion ta pa mucha pa siman. 3 siman di ‘vakantie kamp’: E prome siman di ‘vakantie kamp’ ta habri na Sport Center San Nicolas for di dia 7 pa 11 di juli 2014. Y e persona di contacto pa informacion ta sr. Willy Willems, cu ta localisabel na telefoon 584-8903. E di dos siman di ‘vakantie kamp’ ta tuma lugar na Sporthal na Sta. Cruz y ta for di 14 pa 18 di juli 2014. Mientras cu e di tres y ultimo siman e ‘vakantie kamp’ ta na Compleho Deportivo Frans Figaroa na Noord y ta for di 21 pa 25 di juli 2014 . E persona di contacto pa duna informacion di Sta. Cruz y Noord ta sra. Jacqueline Ponson-van Putten y ta localisabel na telefoon 582-4987. E orario di e tres siman di ‘vakantie kamp’ ta for di 8’or di mainta pa 1’or di merdia. Pa area di Sta. Cruz por yama tambe na oficina di ASU na telefoon 585-4067. Programa di ‘vakantie kamp’: Durante e tres siman di ‘vakantie kamp’ e muchanan ta haya un programa organisa y varia di cual ta encera ‘Deporte y Movecion’ tur dia. Tambe tur mucha ta ricibi 1 sandwich, 1 juice y 1 fruta pa dia. Den e siman tambe tin un biaha cu nan ta bay lama of piscina. E programa di ‘vakantie kamp’ ta dirigi pa mucha muher y mucha homber for di 6 te cu 14 aña. Y ta acepta te cu participacion di 100 mucha pa localidad/siman. IBiSA ta invita mayornan pa incribi nan yiu(nan) trempan pa sigura nan participacion na e ‘vakantie kamp’ 2014. Pa mas informacion por tuma contacto cu e personanan di contacto menciona ariba.