Colegio Arubano ta presenta un espectaculo titular
“Zonder Bagage”. Den e musical aki lo presenta e tema di prehuicio. E show ta diamars, 31
di mei, 7:30 pm na Cas di Cultura. Colegio Arubano ta reuni al rededor di 100 alumnonan di e
cuater disiplinanan di arte cu unicamente na Colegio Arubano ta wordo duna como material
na scol. E carchinan ya caba ta obtenibel na e oficina di administracion di Colegio Arubano
durante ora di oficina.
Despues di e exitoso presentacion di e musical na 2015 pa conmemora 55 ana di Colegio
Arubano, a nace e deseo di e alumnonan y di e docentenan pa hasi e musical un parti di e
curriculum di arte na Colegio Arubano. Na comienso di e ana escolar 2015-2016, juffrouw
Diana Antoinette (baile), juffrouw Anne de Bruijn (arte visual), juffrouw Femke Hooijmaaijers
(drama) y juffrouw Jane Lanoy (canto & musica) a reuni al rededor di 100 alumno pa forma
parti di e projecto pa e musical 2016 “Zonder Bagage”.
Colegio Arubano ta conta cu hopi alumno talentoso den arte. E alumnonan a duna forma na
e projecto for di comienso te fin. E diseno di e poster, e texto di e obra, musica & canto, e
coreografia, e imagennan visual durante e presentacion y e materialnan di presentacion, tur
ta tareanan cu e alumnonan a hasi bou guia di e docentenan.
E tema di e musical “Zonder Bagage” ta trece dilanti e problematica di generalisacion di
hende di diferente cultura y nacionalidad. E maleta ta e prejuicionan cu ta percura cu un
persona no ta hanja un oportunidad husto. E tema ta uno cu hopi peso. Den e musical e ta
wordo presenta den un forma humoristico pa demostra cu ora bo biaha sin maleta, bo por
experencia hopi mas goso. Esaki ta locual e publico lo experencia durante e presentacion di
e alumnonan di Colegio Arubano.
Pa por mustra comunidad tur locual e alumnonan ta hasi, Colegio Arubano ta presenta e
musical “Zonder Bagage” pa publico general durante un anochi di presentacion den Cas di
Cultura riba diamars anochi, 31 di mei, cuminsando pa 7:30 pm. E carchinan ta costa Afl.
15.00 y ta obtenibel na oficina di administracion di Colegio Arubano. Cu e fondonan di e
presentacion, Colegio Arubano por sigui sostene e projecto pa e siguiente ana escolar.
