Ganado Tico Flanegin di Mira Sol Bar hunto cu Garrett Koolman di Brouwerij Nacional Balashi.

Tico Flanegin di Mira Sol Bar a gana cu su bebida “Dushi yiu”


: Recientemente Brouwerij Nacional Balashi, agencia di e liña extenso di e marca prestigioso “Bacardi” a inicia cu e prome evento di nan “Bacardi Bartender Shoot Out Contest”. E prome competencia a resulta masha exitoso. Durante e prome rond, tres bartender di diferente bar local a inscribi y a participa den e tremendo competencia aki. Ta trata aki di Tico Flanegin di Mira Sol Bar di Radisson Hotel. El a competi cu su bebida “Dushi yiu”. Hans van der Oeterlaar di Cilo Cafe a competi cu su “Island Tropical Mojito”, mientras cu Tina Werleman di Mulligan’s a competi cu su bebida “Tina Mia”. E tres bartendernan a participa uzando e producto “Bacardi Pineapple Fusion” como ingrediente principal den tur e bebidanan. E huradonan a sigura cu tur tabata masha dushi mes! Tur siman lo tin un marca diferente di e famia grandi di productonan procedente for di e liña Bacardi cu cual e bartendernan lo crea un bebida y asina demostra nan creatividad, mientras lo husga specialmente nan presentacion. Diasabra anochi, durante e programa bibo di futbol Mundial na Tele Aruba, a anuncia e prome ganado cu a resulta den persona di Tico Flanegin. Riba e fotonan adhunto por aprecia Garrett Koolman, ehecutivo di Brouwerij Nacional Balashi, hunto cu dos di e participantenan en studio di Tele Aruba na momento di anuncia e ganado den e prome rond. A entrega un regalo na tur e participantenan mientras cu e ganado, Tico Flanegin, a ricibi un tas yena cu productonan di Bacardi. Pa e siguiente simannan lo continua cu e competencia y na final di 7 siman lo tin un gran sorpresa. Keda pendiente pasobra pronto Bacardi ta anuncia un evento mahestuoso pa clausura e “Bacardi Bartender Shoot Out Contest”. Pa esunnan cu lo kier haya e ingredientenan of mira con ta traha e bebida ganado di e siman aki, djis click riba http://youtu.be/gUbeX82p9WI y bo ta cla!