Prensa local recientemente a wordo ricibi pa Hotelero Jan Van Nes y su empleadonan pa un tour di Blue Residences y un anochi inolvidabel na The Kitchen Table by White.
Blue Residences, e prome resort di condominio di luho pa habri riba Aruba su famoso Eagle Beach den 20 aña, actualmente ta den su ultimo fase di desaroyo, y lo consisti di tres toren residencial. E prome toren a wordo ocupa na cuminsamento di 2014, ofreciendo un bista riba lama sin interumpcion, plafondnan eleva den e cambernan di drumi, salanan di estar y salanan di come, terrasnan di Jacuzzi priva, cushinanan completamente apunta cu ekipo di calidad halto, y wireless internet den henter e condominio.
E amenidadnan ofreci riba e propiedad di Blue Residences ta inclui un playa priva, servicio na e piscina, un concierge cu ta dispuesto pa yuda na cualkier momento, un sala di fitness, un mini tienda y un operacion elabora di cuminda y bebida maneha pa Chef Urvin Croes, kende tabata e desaroyador exclusivo di Mirador Terrace, e Frangipani Bar y un studio culinario cu ta hiba e nomber Kitchen Table by White, pa sirbi huespetnan di e resort y e publico en general.
E chef ganador di premio, su brigada culinario y su ekipo di servicio, hunto cu gerente di proyecto Alberto Perret Gentil y su casa Veronica, a malcria e miembronan di prensa na final di nan tour informativo di inspeccion na e resort.
E anochi a cuminsa cu un sin fin di kelki di Prosecco, riba e terras cu bista riba Eagle Beach y e teatro di bunita bahadanan di solo. Chef Urvin su interpretacion di 8 plato di specialidad di cuminda Arubiano a cuminsa cu un plato individual cu un mescla di hors d’oeuvres, incluyendo pasapalonan tradicional completamente inventa di nobo.
Unabes cu nan a drenta e sala di come airecondiciona, e VIPnan a wordo malcria cu un Tiradito di pisca fresco cu parchita y cocolishi chikito, saborea cu banana di rif, cual ta un tipo di mata sala cu ta crece banda di lama, sigui pa un Snapper Crioyo de-construi, cu un Pan Bati miniatura y ciboyo tempera, un pida sabroso di carni di porco cu un kale chip hasa y druif, y un carni stoba cu a smelt den nan boca, cu ciboyo y wortel prepara riba grill, manera nada cu nan a yega di purba.
E anochi den e studio culinario a permiti e miembronan di prensa pa haya un bista di serca di e cushina di exhibicion, unda e platonan a wordo prepara y presenta como parti di e anochi su gran espectaculo. Un sinfonia di pasaboca den forma di coco y pineapple a pas perfectamente cu e musica di guitara acoustico.
E ekipo crea pa Chef Ehecutivo Urvin Croes a inclui Hemer Zambrano tapas chef, Carlito Castillo-gerente/sommelier, Ludoviko Henriquez, sous chef, Moises Ramirez y Jean Claude Werleman, ambos coki, cu e bunita waitress-nan Laura croes, Perlita y Shirley!
E miembronan di prensa di berdad a tuma un tiki tempo pa relaha y disfruta di e sabornan increibel, combina perfectamente cu un seleccion excelente di biña, manera por ser mira riba nos portretnan.
