Switch Foundation : Kico ta Build It With Art: Edicion 1


1. Build it with art: Edicion Ta un iniciativa nobo di Switch Foundation cu

e colaboracion di EMCO pa promove y yuda desaroya e talento artistico di un

hoben Arubiano, cu ta desea di bira un profesional den e artenan visual manera

illustration, painting, photography, fashion design of graphic design. Nos ta kere

cu arte ta un medio poderoso pa construi ciudadanonan sano pa nos pais y pa

desaroya profesionalnan productivo den e areanan aki y nan creatividad por ta

un contribucion masha grandi pa nos economia ora nan construi productonan y

servicionan nobo, tambe trece mehoria y enbeyece nos edificionan y espacionan

publico.

2. Switch Foundation ta hopi contento di conta cu e apoyo di e famia di

EMCO pa realiza e promer edicion na unda nos ta cuminza chikito y a haci un

alianza cu e Academy of Fine Arts & Design di Aruba cu a postula 5 hoben cu ta

desea di drenta den e ‘Curso Preparatorio’ cu lo preparanan pa por continua un

profesion den e artenan visual. E hobenan lo entrega un boceto di un dibuho

unico cu lo mustra e originalidad, tecnica y en especial lo proyecta un mensahe

positivo pa e hubentud di Aruba. Nan tambe lo comparti cu e hueznan nan

compromiso y motivacion pa cu arte. E dibuho selecciona na luna di Maart door

di e hueznan Jhon Freddy Montoya, Departamento di Cultura, Lara Kuiperi,

artista visual y Gionina Engelhardt, Fashion designer y PR di EMCO, lo wordo

proyecta ariba T-shirts cu lo wordo produci cu e ayudo di e team di produccion di

EMCO.

Emco lo guia e hoben selecciona door di full e proceso di screen printing

pa e siña y sinti su mes comprometi cu e realizacion di su mesun T-shirt cu lo

wordo bendi te ora cu e suma pa paga e ‘Curso Preparatorio’, cu ta cuminza na

luna di September cu un duracion di 7 luna, wordo colecta y asina e mes

traha pa su soño hunto cu Emco su apoyo.

Nos promer edicion di Build It With Art ta un proceso di exploracion y

aprendizahe y a dicidi di cuminza chikito pa asina nos por evalua y conoce mas

di e proceso artistico aki cu e speranza pa e proximo edicionan por bira algo mas

grandi y traha hunto cu otro scolnan di arte y otro companianan cu desea di

apoya esaki.

Unda lo por haya sa mas di e proyecto?

Por sigui e proceso completo cu a cuminza na January na e Facebook di

EMCO for di nominacion, seleccion di e hoben, e hoben elecciona ta haci e

produccion di e t-shirts na EMCO y e benta di e T-shirts, y asina nos tur yud’e

recauda e fondonan.


Leave a Comment