Stof di Sahara y su efecto riba bo salud


ORANJESTAD, Aruba – 25 di juni 2019: Departamento Meteorologico di Aruba recientemente a saca un comunicado riba e fenomeno di naturalesa referi como “Sahara Dust” y con esaki lo afecta nos atmosfera. E fenomeno aki no ta nada nobo, eta sosode na mas cu un ocacion pa aña na momento cu e stof di Sahara ta wordo transporta atravez di aire pa nos region.

Cu yegada di e stof aki, nos por experencia aumento den kehonan relaciona cu malesanan respiratorio. Esaki debi cu e aire ta consisti di hopi mas stof cu nos ta custumbra cune. Esnan cu ta sufri di malesanan respiratorio manera bronkitis, alergie of sinus por presencia aumento den nan sintomanan manera dificultad pa hala rosea, precion den pecho, hopi
tosamento, grawatamento di cuero y wowo. Stof di Sahara ta ocaciona tambe cu tempo ta bira mas calor pa cual motibo ta recomenda pa bebe mas likido durante dia pa tene e curpa hidrata.

Como Departamento di Salud Publico nos ta conseha tur persona cu ta sufri di un of otro malesa respiratorio pa percura pa tin nan medicamentonan na nan alcanse na tur momento y tuma esakinan manera dokter ta prescribi. Evita di haci actividad fisico den aire liber den e dianan benidero y si tuma nota cu e sitomanan ta empeora, tuma contacto cu bo dokter di cas pa un consulta.


Leave a Comment