Stichting Musica ta informa cu “TUR” cos ta cla pa inscripcion pa Aruba su Caiso & Soca Monarch 2015

Stichting Musica kier a anuncia cu Diadomingo 11 di Januari, cu e inscripcion pa Aruba Caiso & Soca Monarch 2015 lo tuma lugar den D2I Club cu ta situa den Crijnsenstraat #8 cu ta keda net banda di Winter Garden y pariba di Astoria na SanNicolas. E inscripcion ta programa pa cuminsa 5’or di atardi y ta clausura 8’or di anochi. Despues di clausura e inscripcion, lo anuncia cuanto Banda y participante lo tin, y alaves lo informa cuanto anochi di Pre-Final lo tin definitivamente pa e Aruba Caiso & Soca Monarch 2015. Stichting Musica ta pidi pa cada Banda of participante, por fabor download e formulario riba Facebook di Stichting Musica pa asina cada participante ta bon informa y alaves pa sa kico ta e documento nan necesario cu nan lo mester presenta na momento cu nan bin inscribi. E anochi sigur por conta cu transmision di varios radio y Television cu lo ta presenta pa informa pueblo completo con e inscripcion ta bayendo. Ambiente y e popular Mamamento di Gay entre e participantenan sigur no por keda afo diadomingo awo. Te ainda e anochi nan di Pre-Final ta programa pa tuma lugar Januari 27, 28, 29, y e final lo ta Diasabra 31 di Januari, 2015. No lubida cu Diadomingo awo, Stichting Musica ta invita cada Banda, Participante pa presenta na D2I Club pa asina nos pasa un rato ameno y agradabel cu otro durante e inscripcion di Aruba su Caiso & Soca Monarch 2015. Entrada pa e Festival y Punto nan di Benta, Stichting Musica lo anuncia despues manera cu tur cos ta cla.