SMAC a anuncia Schedule pa Carnaval 66


Den un Tinashi completamente yen, cu carnavalista, reina, prins & pancho, representante di Grupo Uni, Representante di Musica, Mandatarionan presente, prensa, miembro nan di board di SMAC, sponsor y stakholders nan, Stichting Maneho di Aruba su Carnaval (SMAC) a lansa e schedule pa loke ta Carnaval 66.

Por a tuma nota, cu e cambio di mas grandi ta cu practicamente tur evento lo wordo organisa na Carnival Village. Den combersacion cu Jason Brown, e presidente actual, e la elabora un tiki riba esaki: “E ta masha fasil, nos tin un Carnival Village y nos mester hasi uso di dje”. Lo arma un escenario y esaki lo keda den Carnival Village pa henter e temporada di Carnaval.

Repasando e schedule, nos a tuma nota cu ta bin bek cu eleccion di Reina di Scol, tambe tin Reina di Paradera, cual ta mustra den direccion cu e celebracion ta jegando bek den districtonan di Aruba. Algun evento nobo, ta un Carnival Costume Show, cu lo tuma lugar den November, a split e final di Caiso & Soca Monarch den dos anochi. Nos a compronde cu tin un sopresa grandi pa e diasabra, pero nos ta warda pa Musica divulga esaki, ta cu nan ta e organisacion encarga cu e evento aki. Dia 8 februari 2020, lo tin un concierto cu ta hiba nomber di Unity Flag Fest, cual tambe ta algo nobo riba e schedule pa loke ta Carnaval 66.

Un aspecto cu e board nobo di SMAC a tene na cuenta cune, ta cu durante e ultimo aña nan aki, hopi tabata e comentarionan negativo cu ta caba e Carnaval diadomingo pa asina duna espacio pa bula bai Korsow. No ta tur carnavalista tabata contento cu esaki, dus a opta pa bin bek cu e Old Mask Parade cual lo tuma lugar diamars y tambe SMAC a oficialisa e evento cu semper ta trese masha hopi ambiente mes, cual ta e Burn Out Monday cu ta tuma lugar na Baby Beach.

Mas e dia nan ta pasa, SMAC lo ta mandando informacion riba cada evento individualmente. SMAC kier a tuma e oportunidad aki di gradici ATA, AAA, Gobierno di Aruba, SETAR, Mac 4U, Romar Trading, Final Format, APA, Brandweer, DOW, KPA y tambe Serlimar. Sin nan aporte, tur esaki lo no ta posibel.