SIMAN DI VACUNACION DEN AMERICAS “Vacunacion: hinca bo miho goal”
Den cuadro di ‘Siman di Vacunacion den Americas’ Departamento di Salud Publico, Seccion Cuido Salud Hubenil (Jeugdgezondheidszorg) conhuntamente cu Wit Gele Kruis (WGK) ta organisa un extra campaña pa muchanan naci na aña 2009 cu te ainda no a haya e vacunanan di refuerso na edad di 4 aña. Ta trata aki di dos vacuna: uno contra difteria, kinkhoest, tetanus y polio (DKTP) y uno contra cacheton, sarampi y sarampi Aleman (MMR). Esaki ta tuma luga diarason 30 di april di 7’or di mainta te cu 7’or di anochi na consultorio di WGK Noord, Sta.Cruz y San Nicolas. Esaki ta conta pa tur mucha naci na 2009 di cualkier bario cu falta e vacunanan menciona. Ta pidi mayor pa trese e buki di vacunacion si esaki ta disponibel. Lo no tin ningun gasto envolvi pa vacuna bo yiu. Hasi uso di e oportunidad aki pa vacuna bo yiu!
Desde 26 di april te cu 3 di mei, paisnan den e region panamericano, conhuntamente cu Organisacion Pan Americano di Salud (PAHO) y otro partners, ta celebra e di diesdos (12) edicion di ‘Vaccination Week in the Americas’. E tema regional pa e siman di vacunacion 2014 ta “Vacunacion: hinca bo miho goal” (“Vaccination: your best shot”). E yamada aki pa tuma accion a keda scogi pa enfoca riba e importancia di ta proteha contra malesanan prevenibel pa medio di vacuna y particularmente sarampi y sarampi Aleman den contexto di celebracion di Copa Mundial benidero na Brasil. Di e 32 paisnan participando den Copa Mundial, 19 a raporta casonan di sarampi na 2013.
E region panamericano a interumpi transmission endemico di sarampi na 2002 y di sarampi Aleman na 2009. Paisnan den nos region ta finalisando e proceso di documenta y verifica e eliminacion di sarampi, sarampi Aleman y sindroma congenital di sarampi Aleman. Mientrastanto, sarampi ta circulando mundialmente y paisnan manera Brasil, Canada, Ecuador y Estados Unidos, a raporta casonan di sarampi liga na casonan importa di otro region. Aumento di biahamento internacional y movecion di hende den cuadro di Copa Mundial lo aumenta e riesgo di casonan importa di sarampi, sarampi Aleman y otro malesanan cu por wordo preveni pa medio di vacuna.
