Guia di consumo di salo 2014

‘Siman di Menos Salo’ en conexion cu Dia di Presion Halto


Dia Mundial di presion halto ta wordo celebra tur aña dia 17 di mei. Meta di esaki ta pa pone atencion di publico riba importancia di prevencion y complicacion di un presion mucho halto. Tur aña ta scohe un tema cu lo dedica atencion na dje. E tema di e aña aki ta: ‘Sa kico bo presion di sanger ta’ (know your numbers). Segun stadisticanan, aproximadamente cada 3 den 10 persona ta sufri di presion halto mundialmente. Esaki kiermeen cu mas of menos 1.8 billion di hende ta sufri di e condicion aki y e factor mas sorprendente ta cu 50% di e personanan aki no sa cu nan tin presion halto of nan no ta tuma accion pa controla esaki. E cifranan di Aruba no ta mucho diferente: 1 di cada 2 hende homber tin presion halto y 1 den cada 3 hende muher. Pa e motibo aki IBiSA conhuntamente cu SVB, AZV, WGK, Departamento di Salud, y Fundacion CVA a uni forsa y ta bin cu diferente actividad pa e siman aki. A batisa e siman di dia 17 pa dia 23 di mei cu e nomber:  Siman di Menos Salo’. Di e forma aki nos ta manda e mensahe pa check presion di sanger y prepara cuminda cu menos salo. Actividadnan planea pa celebracion di ‘Siman di Menos Salo’ ta: Dianan 17 y 18 di mei di 1:00 pm y 5:00 pm: check bo presion di sanger gratis na e booth di WGK na e Feria di Vivienda di FCCA na Renaissance Convention Center. Dia 18 di mei pa 6:30 am: caminata di Gillette 5K. Dia 19 di mei di 9:00 pa 11:00 di mainta: programa di Nos Mainta na Tele Aruba completamente den cuadra di Presion Halto. Dia 23 di mei di 9:00 am pa 12:00 di merdia: haya informacion y check bo presion di sanger gratis den hall di ImSan. Programa di Bus di Salud en conexion cu e ‘Siman di Menos Salo’ ta riba e siguiente fechanan for di 8’or di mainta pa 3’or di atardi: Dia 19 di mei na parada di Arubus San Nicolas. Dia 20 di mei na Winter Garden Savaneta. Dia 21 di mei riba parkeerplaats di WGK/CMB Bank na Sta. Cruz. Dia 22 di mei na Centro di Bario Noord. Dia 23 di mei na Centro di Bario Playa Pabou. IBiSA ta invita henter pueblo di Aruba pa haci bon uzo di e oportunidad aki.