Finale handbal scholar

Siman di final di torneo di handbal na caminda


Dialuna 5 di mei ta cuminsa e siman di e final di e torneo di handbal na Centro Deportivo Libertador Betico Croes mihor conoci como Sporthall Sta. Cruz. Diferente scolnan basico na Aruba a participa den e simannan anterior y 2 scol den cada sector a clasifica pa bataya den e final nacional escolar. E scolnan cu a clasifica a wordo parti den 2 poul. St. Aloysius, Pius X School, Colegio Pastoor Kranwinkel y Scol Caiquetio ta forma parti di Poul A. E scolnan den Poul B ta Colegio Bon Bini, Princes Amalia School, Maria Goretti School y Commandeur Pieter Boer School. Dialuna pa 3’or di atardi e bataya ta dal start caminda cu St. Aloysius School lo midi forza cu Pius X School. Pa 3’or y mei di atardi Colegio Pastoor Kranwinkel ta subi cancha pa bataya contra di Scol Caiquetio. Mientras cu den e ultimo wega di e prome dia, ta bataya contra otro St. Aloysius School y Colegio Pastoor Kranwinkel. E schedule ta percura cu e cuater scolnan aki haya oportunidad pa bataya otro otro riba dialuna y diaranson. E scolnan riba cancha di bataya diamars y diahuebs ta Colegio Bon Bini, Princes Amalia School, Maria Goretti School y Commandeur Pieter Boerschool. E scolnan cu sali na prome y di dos lugar den cada poul ta bataya diabierna pa e titulo maximo. Mes dia tin wega pa di tres y di cuater lugar. Diabierna e torneo ta start 3’or di atardi y segun planning e ultimo bataya entre e scolnan ta termina pa 5’or di atardi, sigui pa entregamento di premio. IBiSA ta invita tur alumno di e scolnan participante pa bin apoya su scol. Tambe ta extende e invitacion na e mayornan y henter pueblo di Aruba pa tey presente y apoya/sostene e muchanan den e torneo di handbal. Hiba un bida saludabel ta muchu mas cu come saludabel, e ta inclui tambe deporte, movecion y sosten.