Servicio di GKMB a ricibi mashin di fumigacion nobo

ORANJESTAD, Aruba –18 december 2019: Gele Koorts en Muskieten Bestrijding a ricibi ayera dos mashin nobo pa combati sangura. Esaki ta un inversion di mas of menos 45 mil florin cu Minister di Salubridad Publico a haci pa por sigui combati y preveni malesanan transmiti door di sangura. E mashinnan ta di marca Igeba cu ta produci na Alemania y a wordo entrega door di nan agencia na Aruba cu ta DAL pestcontrol. Ta trata aki di dos aparato di cual e prome mashin ta un ULV (Ultra Low Volume) aerosol generator. E meshina aki ta uza volumen halto di aire na un presion abou pa transforma pesticida likido den drupelsnan cu por wordo distribui den e admosfera. E di dos mashin ta un Thermal fogger cual por produci gran cantidad di huma di pesticida cu ta wordo uza pa fumigacion. Ambos aparato lo wordo usa ora tin hopi molester di sangura den bario nan of ora tin alerta di outbreak di malesanan transmiti door di sangura manera por ehempel Dengue, Zika y Chikungunya. Ambos mashin por wordo usa tambe pa combati e sangura preto cu ta sangura di mangel, comun den e area di savaneta y Pos chiquito. Cu yegada di e dos mashinnan aki e personal di GKMB ta hopi contento pasobra nan por sigui eherce nan trabou, solamente awo den tempo mas cortico y nan ta bon equipa y prepara pa cualkier eventaulidad riba e tereno di combati sangura.

•