CAC 2015.5

Seleccion Hubenil Den Preparacion pa CARIFTA Junior Chess Championship (St. Croix)


Federacion di Ajedrez Aruba (FAA) ta den preparacion cu su seleccion hubenil cu lo participa otro siman n’e CARIFTA Junior Chess Championship. Esaki ta e di cinco edicion y lo ser organisa na St. Croix, US Virgin Islands di 24 pa 29 di Maart benidero. Anteriormente, Aruba a participa na e di dos (Jamaica) y di tres (Martinique) edicion di e torneo regional aki cu ta ser considera como e Campeonato di Caribe. E CARIFTA Junior Chess Championship lo tin 7 buelta unda e categorianan oficial ta U-20 Open y Feminine, U-16 Open y Feminine, y U-12 Open y Feminine. E hungadornan cu termina na di prome tres posicionnan lo gana copa, mientras cu tin medaya pa e categorianan no-oficial di U-18 (Open y Feminine), U-16 (Open y Feminine), U-10 (Open y Feminine) y U-8 (Open y Feminine). Tambe lo tin premio pa e paisnan cu ta termina (segun un sistema di puntuacion) n’e prome 3 lugarnan. Un total di 7 hungador lo participa pa Aruba: Woman Candidate Master Annelaine Jacobs lo participa den U-20 Feminine; na 2014 (Martinique) el a bira Campeon di U-20 Feminine y a gana medaya di oro pa U-18 Feminine. Mark Bueno, actual campeon Hubenil y Senior di Aruba, lo hunga den U-20 Open. Brian Diaz lo participa den e categoria di U-16 Open; na 2013 (Jamaica) el a bira Campeon di U-12 Open y na 2014 (Martinique) el a gana medaya di oro den U-14 Open. E anja aki FAA lo ta mas enfoca riba e categoria di U-12 unda lo participa cu 4 hungador: Kyell-Jean Antonio (hungador di aña di FAA bou di 13 aña), Ethan Croeze (actual nr. 1 di Aruba den U-12) y Ilya Stetsenko (talento hopi grandi). Den categoria di U-12 femenino lo participa Thamara Sagastegui cu ta e Hungador Femenino di aña 2015 di FAA y actual nr. 1 di U-12 Femenino. Hefe di Delegacion lo ta Candidate Master drs. Raymundo Dijkhoff. E fin di siman aki e integrantenan di Team Aruba lo ta participando na e Torneo Himno y Bandera cu lo ser hunga riba 17, 18, 19 y 20 di Maart na club di FAA situa na Nieuwstraat 11 y lo fungi como un ultimo torneo di preparacion prome cu e delegacion sali di biahe otro siman. E entusiasmo ta asina grandi, cu pa di prome biaha tin un grupo di mayor cu lo biaha hunto cu e delegacion oficial di Team Aruba. FAA di awor caba kier a desea e seleccion hubenil hopi exito na St. Croix y kier a gradici Comision di Subsidio, ACE Firm, directiva y mayornan pa e sosten financiero ricibi. Tambe FAA kier a desea henter pueblo di Aruba un Feliz Dia di Himno y Bandera y ta invita tur amante di ajderez pa pasa na club pa presencia e Torneo Himno y Bandera y mira e talentonan hoben den accion.