Fiel na su lema: E Biña Perfecto pa Cada Momento, Federico Trost, Gerente di Export di Santa Margherita Winery, a facilita un seminario di purbamento di biña cu mas di 50 persona cu ta traha den e ramo di hospitalidad y cuminda y bebida, durante su bishita recien riba e isla.
Representantenan di Romar Trading y artista di biña Clive Faustin, kende ta e lider di portofolio di biña y cuenta na Romar Trading, tabata presenta pa asina yama e invitadonan bon bini den e Grand Caribbean Ballroom pa un atardi di educacion y enrikicimento.
Pinot Grigio, Chianti Classico Riserva, Prosecco y Sparkling Rose tur a wordo purba y aprecia mientras cu e grupo a descubri e delicianan di un glas di biña perfectamente frieu.
Trost a conta e grupo cu na añanan 70, Anthony Terlato a bira e top importador di biñanan Italiano di e miho calidad pa Merca. E tabata di e opinion cu tabatin un oportunidad pa biñanan Italiano di calidad mas leu cu djis e listanan tradicional di biña den restaurantnan Italiano, y el a pensa cu amantenan di biña tabata cla pa experiencia un biña blanco Italiano cu tabata berdaderamente di e miho calidad. Mientras cu e tabata na Italia, el a explora un variedad di region y variedad y el a determina cu Pinot Grigio tabata e biña cu lo por revoluciona e percepcion di biñanan Italiano na restaurantnan di alta clase. Den un restaurant na Italia, el a pidi tur 18 Pinot Grigio riba e lista y el a purba cada un. Ora el a purba e Santa Margherita Pinot Grigio di e famia Marzotto, e tabata sa cu el a encontra su biña y e relacion perfecto.
Tony a ser yama e “tata di Pinot Grigio” y “un di e personalidadnan di biña mas experiencia na mundo” pa e hecho cu e tabata un pionero di regionnan, variedadnan y marcanan for di tur rond di mundo. Funcionando como un pionero di e categoria di Pinot Grigio na Merca cu Santa Margherita, el a crea e marca mas exitoso y el a establece Pinot Grigio como un variedad sumamente stima rond di mundo. Fresco, elegante, Santa Margherita ta sigui di ta e marca lider di Pinot Grigio y ainda ta capta e imaginacion di amantenan di biña rond di e pais.
E publico na Radisson Aruba Resort Casino & Spa a hisa nan glas na Anthony Terlato – un inovador y pionero cu a crea e categoria di Pinot Grigio y a habri e porta pa Pinot Grigio y hopi biña Italiano di alta calidad.
Aki por mira e seminario di purbamento di biña!
