Resultado Beach Tennis Panamerican Championship 2019 Brazil campeon den tur categoria


Diasabra ultimo, Aruba tabata e anfitrion pa e Pan American Championship di Beach Tennis. E campeonato aki a cuminsa diahuebs, 7 di november y a culmina, diasabra, riba un Bushiri Beach Arena completamente yen.

E final den categoria femenino a wordo disputa entre 2 ekipo di Brazil cual nan ta Joana Cortez y Rafaella Miiler contra Flavia Muñiz y Marcela Vita. E duo Cortez y Miiller ta logra gana y asina aki hiba e titulo di campeon pa nan pais Brazil. Den categoria masculino, un biaha mas 2 ekipo di Brazil a batalla, caminda VIni Font y Andre Baran a kita e titulo for di Marcus Ferreria y Thales Santo. Ambos ekipo ta di Brazil.

Pa loke ta e categoria di mix, aki tambe por a mira un final entre Brazil y Brazil, E duo, cu ya pa añanan largo ta domina e categoria di mix mundialmente, esta Vini Font y Joana Cortez, ta perde nan contra Rafaella Miiller y Andre Baran.

Beach Tennis Aruba kier a manda un palabra di danki na cada un cu a bin presencia e weganan durante e Panamerican Championship 2019 y alaves kier a invita Aruba completo pa pasa na Bushiri Beach pa presencia e torneo di Aruba Open Beach Tennis cu lo continua te cu diadomingo 17 november.

Pa mas informacion riba weganan, por bishita nos website na www.arubabeachtennisopen.com