Pueblo di Aruba por yuda completa e decoracion di Kerstboom di Speransa.

Comunidad di Aruba por yuda yena tur bala di pasco riba e kerstboom di Retonde Tanki Flip. Por yuda dor di cumpra bala di pasco pa solamente 5 florin. Tin 6 color disponibel cu ta representa e cancernan cu ta mas comun na Aruba. Asina e bala peach ta para pa cancer di matriz, e bala roos ta para pa cancer di pecho, cancer di prostaat a haya e bala blauw cla y e bala blauw scur ta simbolisa cancer di tripa. E bala oraño ta para pa cancernan di riñon y lukemia y finalmente e bala lila ta simbolisa cancer en general. E carchinan pa cumpra e balanan di pasco ta obtenibel na Universidad di Aruba (Apex Building banda di Crown na Boulevard) y na Koningin Wilhelmina Kankerfonds. E meta tras di esaki ta pa envolve comunidad di Aruba pa yena tur bala di pasco riba e kerstboom. Dia 25 di december benidero lo por mira e kerstboom ful dorna na e balanan di pasco. Pueblo di Aruba ta keda cordialemente invita pa participa den e bunita causa aki y hunto nos lo realisa e meta principal cual ta conscientisacion riba cancer na Aruba.