E celebracion di e prome lustro di torneo di golf di Kiwanis Club of Aruba, cu e meta pa recauda fondo cu a inicia bou iniciativa di e miembro, Giantonio Muller, a resulta den otro evento exitoso di e club. Mayoria di e participantenan di e añanan anterior, por a mira nan, un biaha mas presente riba diadomingo mainta di 16 di maart hunto cu nan team na The Links at Divi Aruba, pa forma parti di e torneo di golf aki.
E torneo a inicia na tempo cu e amantenan di golf yen di entusiasmo y energia, pa inicia un tremendo torneo cu apesar di e solo y calor, nan a haci nan maximo esfuerso pa e aña aki si bay cu e premio maximo. Na final di e torneo ningun team no a logra e premio di hole in one cu tabata un Ford Explorer 2014 cortesia di R.E. Yrausquin & Sons.
E ganadornan di e torneo di e aña aki ta e siguiente personanan. Closest to the pin: Harold Hagens. Longest drive: Ruben Goedhoop. Best gross: Nigel Nedd, Larry Nedd, Floyd Nedd & Ray Perez. Best nett: Ruben Goedhoop, Pim Smits, Ricky Beaujon en Francis Ras.
Durante e ceremonia di entrega di premio na e ganadonan, Kiwanis Club of Aruba, a tene un subasta, cortesia di e patrocinadornan cu tabata Insel Air y Divi Aruba, cu a regala 2 ticket pa Miami y tambe un estadia di un week-end combina cu un ronde di golf complimentario. Entre esunnan presente, e subasta mas halto tabata di Shurby Ranis, Marcel Solagnier y Pierre Rafini, pa asina contribui conhuntamente cu e fondo di torneo p’e wordo aumenta. For di e suma recauda Kiwanis Club of Aruba a haci un donacion na YMCA di e suma di Awg. 11.910.
E president di Kiwanis Club of Aruba, Guito Croes hunto cu Ryan Kock, cu ta e director di e fundraising committee a haci entrega di e check na Nathaly Harms y Garrick de Cuba. Cu masha gradicimento nan a ricibi e donacion y a splica cu e fondo aki lo bay pa un biblioteca na e centro, situa na San Nicolas. Esaki lo bira un biblioteca diferente, cu lo duna oportunidad na e muchanan pa wordo educa riba un otro nivel, haciendo uzo di e tecnologia moderno.
Despues di e entregamento di e donacion, a sigui cu entregamento di e premionan na e feliz ganadonan di e torneo di golf den su celebracion di e prome lustro. Un danki inmenso ta bay di parti Kiwanis Club of Aruba na e patrocinadornan; AIB, Guardian Group, CMB, Gandelman Jewelers, Ricola, AFAS Software, Medwork, Cajojo Services, Aruba Bank, Deloitte, Setar, Banco di Caribe, Ennia, Nagico, Forensic Services Caribbean, Aruba Airport Authority, Crown Electronics, MAC4U, Hyatt, ASAP Services, Neutrogena, AIG, ATLAS y Aruba Trading Co.
Kiwanis ta un organisashon global di voluntarionan dedica na cambia mundo via di un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informashon di Kiwanis Club of Aruba y of su actividadnan por acudi na www.kiwansaruba.org. Tambe por bishita e website di kiwanis Internacional na www.kiwanis.org.
