Presentacion di Buki pa Mucha pa medio di Digiboards


E Festival di Buki pa Mucha ta ofrece contenido digital e aña aki. Tanto via e website di biblioteca, Facebook, YouTube y tambe pa medio di e proyecto di Digiboards den klas. Ofreciendo material digital apto pa Digiboards pa uso den klas ta un initiativa piloto pa Biblioteca Nacional Aruba. E storianan di e buki pa mucha Ora Ubao / Schelpeneiland  den 2 idioma por wordo presenta y trata via Digiboards. Tambe e informacion tocante e autornan cu a skirbi storia pa e buki aki. Ademas tin extra informacion y fuente pa busca mas informacion.

Pa medio di Digiboards tur alumno den klas hunto por lesa e buki di e Festival di Buki pa Mucha. Por hacie interactivo, duna otro turno pa lesa of haci pregunta. E maestro por lesa e buki mientras cu e alumnonan ta wak e imahennan y texto riba Digiboard. Tambe tin un version estilo ‘Kamishibai’ disponibel cu tur ilustracion di e buki. Den e version aki e ilustracionnan ta yena e pantaya completo, sin texto.

E presentacion aki a keda traha den Prowise Presenter-omgeving, Esaki ta un online tool pa traha material y les interactivo. E instrumento aki ta disponibel riba tur Prowise Digiboards. Esaki ta den uso p.e. na diferente scol publico (DPS) y scolnan di SPCOA. Pero esaki ta posibel tambe riba otro tipo di Smartboards y Digiboards via e browser. Of pa medio di cualkier computer conecta cu un smartscreen of beamer/projector, tanten cu tin conexion di Internet. Docentenan por crea un account gratis pa habri e contenido di e Festival di Buki pa Mucha y tambe pa crea nan mes les.


Leave a Comment