Directora di Biblioteca Nacional Aruba a haya bishita di yiu muher y nieta di poeta sra. Lolita E.
Euson (q.e.p.d.). Meta di e bishita tabata pa presenta e obra di poesia nobo di sra. Lolita Euson
titula ‘Moonlight on the waves’. E launch oficial a tuma lugar na november ultimo den aula di
Wesley College na San Nicolas.
Moonlight on the waves ta un seleccion di un tesoro di poema cu poeta Lolita a laga atras. Su
yiu muher, Sra. Eileen Marsdin-Euson, hunto cu famia a tuma e proyecto riba nan pa produci
otro obra. Prome publicacion di Lolita Euson ta ‘Sweet praises’ y a keda publica na 1988
(Editorial Charuba). Sra. Eileen Marsdin-Euson a indica cu e proyecto aki pa yega na un otro
publicacion tabata un proyecto di famia. Nietanan Shaquissia y Taisha a yuda edita y ilustra e
buki, otro nieta ta yuda cu Public Relations. Asina a yega na un pagina pa Lolita Euson riba
FaceBook. Un proyecto cerca di curason pa sra. Eileen como cu ta trata e poemanan di su
mama.
Moonlight on the waves ta un coleccion di poema cu ta un expresion di un fe fuerte den
creador y cu e poemanan sra. Lolita den su forma poetico ta alaba dios. Pero tambe tin poema
cu ta expresa e amor di e poeta pa su
mama. Mas tanto su poemanan ta papia
di amor. E obra ta obtenibel cerca sra.
Arlene Poulina-Marsdin y por pidi e buki
na 584 5667 of 741 0094, pronto esaki lo
ta obtenibel na librerianan local y tambe
na Dept. Arubiana.
Lolita Esmeralda Euson (27 oktober
1941-13 augustus 1994) tabata un
ciudadano bon conoci den comunidad y a
keda conmemora pa su contribucionnan.
E tabata Ridder in de orde van Oranje
Nassau. Gobierno a duna un caya na
San Nicolas e nomber ‘Caya Lolita E. Euson’ na 1995. Servicio di Posterijen a yega di publica
un stampia conmemorativo di sra. Lolita na 1996. Tambe el a ricibi un premio di World of poetry
Calfornia na 1988.
