Eldrick Boekhoudt conoci local y internacionalmente como “Nutzbeatz” y Stefan Bartels-Daal tambe conoci na nivel local y internacional como “SMB”, ta dos hoben Arubiano “bound for great things” y ta cla y prepara pa sigui crece y triunfa internacionalmente. Nutzbeatz como DJ y SMB como “producer” y “mixer”, a lansa diabierna anochi nan prome “track” internacional den Local Store, unda cu Joyce Bartels-Daal, mama y manager di Stefan; Haydy Boekhoudt, ruman di Eldrick Boekhoudt y dos di nan sostenedonan di mas grandi, esta Darren van Ommeren y Minister di Turismo Otmar Oduber a toca e honor di batisa e produccion “Let’s get Nutz”.
Den un ambiente fenomenal, famia y amigonan cu a sostene e dos artistanan hoben Arubiano for di cuminsamento di nan careranan, hasta prome cu nan a drenta nan “teenage years”, a celebra e lansamento di “Lets get Nutz” cu hopi entusiasmo. DJnan local cu tabata presente e anochi aki tabata Sticky Soundz, Mesquitaz, Myron Kelly, Karixon, Yiemy, Ninjah X, Danivelle y Fellow, cu a haci e anochi uno increibel.
No tin palabra pa describi con bon e produccion a wordo ricibi tanto localmente, unda cu ya su siguiente dia por a scuch’e na radio y ni papia mes di e cantidad di personanan rond mundo cu ta scuchando e rond mundo via di Soundcloud, entre otro. Ta bon pa menciona cu e meta principal di e hobennan aki ta pa sigui yuda hiba nomber di Aruba dilanti y internacionalmente den un manera positivo. Gradiciendo Dios Tata todo poderoso tur dia pa e bendicion di talento y amigo cu ta sostene nan pa yega na metanan grandi.
Tur cos a cuminsa algun aña pasa cu un bon amistad cu a forma rond di nan talento grandi. Na februari 2014 nan a cuminsa traha riba un, dos, tres, te cuater track, pero tabata pensa cada biaha cu “ainda no”, te ora nan a realisa nan di cinco track. Den e proceso nan a capta atencion di y a wordo acerca pa un di productornan mas grandi mundialmente, esta Maarten Voorwerk, nan a traha hunto cu MC Roga – un otro profesional internacionalmente reconoci, y Stefan y Eldrick a conclui cu “Let’s get Nutz” a bira “it”, e track cu ta “cla” y lo bira nan prome track internacional.
Cu lansamento di e “track” aki, nan no ta para keto y ta trahando caba riba ideanan y mas “tracks” pa domina durante e Electric Music Festival di Aruba mes na luna di september proximo. Por spera specialmente di medionan di comunicacion internacional specialisa den EDM cu semper ta buscando un angulo fresco y nobo pa nan relatonan cu nos yiunan di tera tin tur oportunidad pa saca cara y briya.
Minister Otmar Oduber, como Minister di turismo y como Arubiano orguyoso, kende ta brinda apoyo via di su Ministerio na e dos hobennan aki, a expresa cu e ta contento y orguyoso di e forma con Stefan y Eldrick ta mira y traha pa loke nan kier den futuro y con nan ta inclui nos isla den loke nan ta haci. E mandatario ta a splica e importancia pa brinda sosten na e Arubiano hoben cu ta enfocando riba un carera internacional den cualkier ramo unda cu e nomber di nos isla ta destaca y ta liga na actividadnan grandi y positivo.
Minister Oduber a splica cu loke cu SMB y Nutzbeatz ta logrando, como tambe loke nos top deportistanan, incluyendo Sarah-Quitta y Xander ta haciendo internacionalmente, ta contribui na e “branding” positivo di nos isla. Cada biaha cu menciona nomber di Aruba, cada biaha cu mira bandera di Aruba den grabacion, den potret, esey tur ta “branding”. Ta danki na nos hendenan, nos hobennan, cu “Aruba ta wordo asocia cu cosnan positivo, grandi y bon. Y, esey ta loke nos Arubianonan ta haciendo pa nos!” e Minister di Turismo a subraya.
No por keda sin menciona e partnernan cu semper ta para tras di Nutzbeatz . Un danki grandi ta bay na Arthur Ruiz y Julie Henriquez di Setar N.V. como Main Sponsors , Krish Mathani di Elite Production, Lionel y Curt Harms di Local Store pa permiti e evento tuma luga eynan , I Love Musica, Maurice y Karim Neme di Electic Music Festival, Clyde Narain “DJ Chuckie”, Ryan Narain , Ronella Tjin Asjoe-Croes di Aruba Tourism Authority , na tur comerciante cu di un of otro forma semper ta sostene y sin laga afo Prome Minister di Aruba mr. Mike Eman y Minister di Turismo Otmar Oduber, pa nan sosten incondicional.
