Mundo ta interactivo y chikito Ta esencial cu nos studiantenan experencia mundo pafo di Aruba


Na final di aña 2014, e mandatario encarga cu enseñansa na nos isla,

Minister Michelle Hooyboer-Winklaar a yega na un acuerdo cu Universidad di South Carolina (USC).

E acuerdo aki ta encera un beneficio hopi grandi pa nos studiantenan cu ta desea di sigui nan estudio na

Merca pero principalmente na e estado aki.

E acuerdo entre Gobierno di Aruba y e estado di South Carolina ta nifica un reduccion substancial

di e gastonan di estudio pa nos studiantenan di Aruba. Antes tur hoben di Aruba lo mester a paga

e international/non resident tuition fee cu ta un total di $29.440,- pa aña. Awor cu e acuerdo e in-state

tuition fee cu nos hobennan ta bin na remarca pe ta $11.158,- pa aña incluyendo e technology fee.

E siman aki un delegacion di Universidad di South Carolina encabesa pa Presidente di Universidad di

South Carolina, Professor Harris Pastides, Dr. Allan Miller, Professor Robin Pietro, Miss Ann Miller, a

yega Aruba pa conoce un poco mas nos isla y de paso y primordialmente bishita diferente persona y

otro stakeholders cu a hunga un rol di importancia den e acuerdo aki.

Durante e estadia nan a bishita Colegio EPI, Dr. Horacio E. Oduber Hospitaal, waf na Barcadera,

Aruba Ports Authority y naturalmente Universidad di Aruba. Dialuna mainta e delegacion a haci un

bishita cerca e mandatario y tambe a haci uzo di e oportunidad y a bishita Minister President Mike

Un punto sigur cu a resalta ta e charla di President Pastides di Universidad di South Carolina.

E charla a tuma luga na Universidad di Aruba y a toca e tema “Challenges (and joys) of American Higher

Education Today”. Un tema sumamente interesante, relevante y actual. Specialmente pa esunnan cu tin

interes den studia na Estados Unidos.

Durante e charla Professor Harris Pastides a elabora riba tur posibilidad cu e studiantenan tin

pa haci nan temporada di estudio mas barata y tambe mas eficaz. Un studiante por ehempel por tuma e

posibilidad di termina su estudio den 2 aña y mey y baha e gastonan den forma remarcabel. Pero tambe

e posibilidad di traha den campus a ser treci dilanti. “Nos ta garantisa un servicio personal, nos ta yuda

den tur detaye, e alumno ta haya den Universidad di South Carolina un cas.”

“Mundo ta interactivo y chikito y ta keda na cada un di nos pa haci nos mundo grandi. Yegando na

acuerdonan manera esun cu Universidad di South Carolina nos ta engrandece esaki”, asina Minister

Michelle Hooyboer–Winklaar a remarca.

“Mi meta ta pa habri mas oportunidad pa opcion pa nos studiantenan. Esey ta esencial. Mas escogencia

pa hisa e chens di exito. Pasobra na final di dia loke ta conta ta e diploma den man. Hecho ta cu nos

studiantenan cu ta studia na Merca of Canada ta termina nan estudio exitosamente, y mas rapido.”


Leave a Comment