Lucia Wolff Suarez a Completa Diez Aña di Servicio na Caribbean Palm Beach Resort

Supervisor di Housekeeping Lucia Wolff recientemente a celebra un logro grandi den su carera na e resort, y esaki a wordo celebra durante un lunch na Sweet Peppers Restaurant. Na honor di e occasion, e tabata acompaña pa Mary Werleman, e Gerente di Recursonan Humano, Cristina Galindo, Housekeeper Ehecutivo nobo y Astrid Muller, e Gerente General interino. Lucia a bin Aruba for di e Republica Dominicano na 1987, ora e tabatin 19 aña di edad, pa bin biba cu su mama y rumannan, kendenan tabata bibando riba e isla caba. El a studia den e programa di Bushiri hotel school pa un tempo, y esaki a crea su pasion pa e industria di turismo y como un resultado di esaki, el a bira un miembro di e ekipo culinario di Calloway Catering, ocupando un posicion den un di e isla su cushinanan mas druk pa mas di diezcuater aña. E siguiente destinacion den su carera a yega na Caribbean Palm Village Resort. Semper e tabata gusta e bunita propiedad di timeshare, ya cu el a casa cu su enamorado, Johnny Wolff, na e restaurant di e resort 23 aña pasa. El a cuminsa traha na e resort como un housekeeper y despues di a comproba su habilidadnan el a bira un full time supervisor. Lucia ta raporta cu e ta disfruta di su tempo na trabou, y e ta anda hopi bon cu tur di su coleganan, gerentenan y e miembronan di e hunta di directiva na e resort. Como un mama di dos, e tin dos yiu muhe, un di 12 aña y un di 19 aña, e ta comodo den su rol di haci hende contento, anticipando y cumpliendo cu e necesidadnan di e huespetnan. Como un miembro excelente di e ekipo di empleado, Lucia a yega di wordo eligi como Empleado di e Cuartal, y el a ricibi e premio di Extra Mile un cantidad di biaha. Riba su aniversario, gerencia, e hunta di directiva y empleadonan di Caribbean Palm Beach Resort a reconoce Lucia pa su lealtad y dedicacion, y nan a desea Lucia hopi aña activo y feliz mas na e resort.