Launch di revista Transcend a tuma lugar diabierna

Biblioteca Nacional Aruba a ricibi un ehemplar di e prome edicion di e revista nobo, ‘Transcend: your sustainable source for the ABC islands’, pa su coleccion nacional. Esaki a keda presenta diabierna anochi na Pepia est den un ambiente di un lounge bar chique. Forsa tras di e revista aki ta sra. Rosalie Klein, conocido periodista y fotografo na Aruba. E ta un revista full color cu bunita potret, idioma ta Ingles. E color, calidad y imprenta ta di Interprint. Transcend ta dirigi su mes riba e tema di sostenibilidad na e islanan Aruba, Corsou y Boneiro y lo sali cada dos luna. Transcend kier ta “E fuente di sostenibilidad pa e Isla nan ABC,” cu ta observa, investiga y informa di tur aspecto di desaroyo sostenibel na tres isla. E prome edicion aki ta trece temanan manera oportunidad di energia solar, Beach clean-up, Green Aruba, studiante y Aquaponics, turismo sostenibel, renovacion di centro di Oranjestad, pionero den sostenibilidad, ECO gas y tips con pa spaar awa. Den futuro por spera e.o. tecnologia di panelnan solar, turismo sostenibel, sostenibilidad y herencia cultural y mas topico interesante. Transcend ta trece esaki na un forma cu nan ta spera cu e lectornan ta haya agradabel y informativo. Distrubucion ta bay via Ling & Sons supermarket, Superfood y otro puntonan di benta. Segun Transcend e lo ta disponibel online y via ISSUU tambe. Transcend ta invita tur hende pa “LIKE” y laga comentario riba e TRANSCEND MAGAZINE Facebook page.