Chef Garcia recientemente a uni su mes na e brigada culinario di e Renaissance Resorts na Oranjestad, unda e lo ta encarga cu su restaurant principal, cual ta un Steakhouse Mericano, y e luga principal pa haya USDA-inspected Certified Angus Beef riba e isla, esta L.G. Smith’s Chop & Steakhouse.
Originalmente di Venezuela cu un orientacion fuerte pa cushinamento Frances y mas despues Spaño, e chef tin como un mision pa introduci sabornan mas atrevido y grandi na e steakhouse preferi na Playa – pensa riba ciboyo, konoflok, biña, specerij fresco y manteca – manera bo ta haya den e Big Oscar Prime Top Sirloin, cu Certified Angus Beef, cubri cu scampi King crab, tiger shrimp, poached lobster y lobster Hollandaise; of e Steakhouse Chop Salad, cu mas di 10 ingrediente delicioso incluyendo applewood smoked bacon y aged cheddar.
E chef a gradua cu honor for di e Scol di Arte Culinario na Venezuela, unda el a wordo elogia pa su diseño, complehidad y presentacion, tambe siguiendo cu su entrenamento como un Sommelier, na e mesun scol. E cos pret, e ta bisa, ta cu el a yega den e cushina despues cu el a caba su estudio na e universidad cu un diploma den Accounting Publico. Despues di a explora algun oportunidad di carera basta laaf, el a dicidi di cambia di rumbo, y transforma su hobby den un carera di bida largo.
“Mi tabata bendiciona,” el a splica, “y por a traha cu algun tremendo chef na Amuse Bistro na Aruba bou di e guia di un doño/chef experiencia, y prome cu esey, na e Hotel Tamanaco Intercontinental, na Venezuela, unda el a ocupa un cantidad di top posicion, educa pa algun di e chefnan mas famoso di Venezuela.”
Entre e promocionnan, Garcia a viaha pa Europa y a sigui desaroya su talentonan na e restaurant di 2 streya di Michelin, Mugaritz, na e restaurant di 3 streya di Michelin, El Celler de Can Roca, y e restaurant di 3 streya di Michelin, Akelare. Tur tres ta establecimentonan renombra na Spaña.
Despues di a perfecciona su talentonan den exterior, el a dicidi di biba na Aruba, disfrutando di e calidad di bida y e serenidad di loke ta bin cu un bida riba e isla.
Garcia ta orguyoso di por raporta cu riba Dia di San Valentin, un dia unda cu no a resta stul den e restaurant, L.G. Smith’s Steak & Chophouse a sirbi steaknan gigantesco di porterhouse pa dos hende, cushina lentamente pa 2 ora, y na ocasion di e restaurant su di 10 aniversario, el a introduci un oferta special y iresistibel di cena, yenando e sala cu bishitantenan, cu e promesa di tremendo cuminda, cumpliendo completamente cu satisfaccion di tur hende presente.
Riba e menu di aniversario, un seleccion di e chef, di cinco prome plato, nuebe plato principal, incluyendo algun plato special manera Certified Angus Beef Prime Top Sirloin Baseball, un corte tierno, hugoso y yen di sabor, Surf & Turf, y un Wellington Vegetariano, ademas di ocho acompañante interesante, y cuater escohencia pa e pasaboca, pa e prijs increibel di $40.-, unda cu e di dos persona ta paga solamente $10.
E oferta, cual ta demasiado bon pa bo perd’e, en berdad ta existi, y bo ta invita pa purb’e den e sala di come moderno y contemporaneo cu ta situa banda di e Crystal Casino, prome cu 12’or di anochi, dia 10 di April, 2014.
Dia di San Valentin y e restaurant su aniversario a marca e prome dos evento di hopi evento planea, incluyendo e re-introduccion di e brunch popular, cual ta planea pa debuta na April, un diadomingo cada luna.
Pa mas den futuro nan a planea un re-lansamento completo di un menu nobo, como tambe e introduccion di cushinamento lento.
Entre esaki, e chef a participa den e evento exitoso di cushinamento competitivo, esta Wema Goes Memphis, unda cu participantenan a cushina y presenta BBQ local, cu tremendo premio. Kelvyn a logra sorprende tur hende cu su receta increibel pa spareribs.
Kelvyn a conta chistosamente cu el a haci cushinamento su carera di bida largo ya cu su mama soltera cu semper tabata trahando, nunca a dun’e cos bon di come, debi na un falta di tempo. E mester a traha pa su mes den e cushina, cual el a haci, y ta sigui haci, na un manera sumamente exitoso.
