open-dag-mariniers-aruba

Koninklijke Mariniers lo duna ganashi di su loteria durante Open Dag na Fundacion Pa Nos Comunidad, Animal Rights Aruba y Aruba Relief Foundation


– Diahuebs dia 1 di mei, e conocido Open Dag di Mariniers Kazerne na Savaneta lo tuma luga. Adicional di nan actividadnan, tur aña Marinierskazerne ta organisa un loteria cu premionan actractivo. Ganashi di e loteria aki ta bay como un donacion na fundacionnan ‘non profit’. E aña aki, esaki lo bay pa Fundacion Pa Nos Comunidad (FPNC), Animal Rights Aruba (ARA) y Animal Relief Foundation (ARF). E Open Dag aki ta pa entre otro e comunidad di Aruba conoce e trabaonan di e cuerpo militar. Esaki lo duna e bishitantenan un bista den nan actividadnan diario. Durante e dia completo ta bay tin demonstracion y actividadnan na unda e bishitantenan por participa. Tambe ta bay tin otro actividadnan di entrenimiento pa tur edad. Pero alabes ta percura pa recauda fondo pa instancianan caricativo. Asina tur aña Mariniers Kazerne ta aporta na diferente fundacion, cu lo ricibi e ganashi di e loteria. E aña aki e ta bay pa Fundacion Pa Nos Comunidad, Animal Rights Aruba y Animal Relief Foundation. E trekking lo tuma luga durante e open dag na Savaneta. Ticketnan por wordo cumpra durante dia. Ya for di dia 18 di april, ticketnan pa e loteria ta na benta y por wordo cumpra tambe na diferente luganan na Aruba. Pa re-enforsa e benta, e fundacionnan a uni forza cu e 14 candidatanan di Miss Aruba, cu lo yuda tambe pa bende e ticketnan. Ticketnan ta AWG 2,- pa cada uno, y premionan fabuloso por wordo gana, entre otro retour ticket pa Amsterdam (2x), weekend stays, sunset cruise, tratamento den un spa, diferente dinner, gift certificate na diferente luga y mucho mas. E placa di e ganashi lo wordo uza pa diferente actividadnan di cada un di e fundacionnan. FPNC ta aporta na e gruponan mas vulnerabel den nos comunidad. Nan projecto principal na e asina yama National Food Bank, na unda entre 200 pa 250 famianan ta wordo yuda tur luna cu cuminda, paña, muebles y otro necesidadnan basico. ARF ta un fundacion non profit, cu ta protega tur fauna, flora y bida marino riba y rond di nos isla. Na 2005, ARA a inicia un campana di sterilizacion, adopta y yuda cacho y pushinan riba caya, y asina dunanan cuido veterinario, cuminda y eventualmente un cas. Pa mas informacion por yama Fundacion Pa Nos Comunidad na 5880002 of na Animal Rights Aruba na 748 5210

Leave a Comment