Kippies

Ira y Ayra Kip, fundadornan di Art Rules, nomina como “Perlanan di e Caribe Hulandes.”


Siman pasa e premionan di Perla di Caribe Hulandes a anuncia 35 nominado na Hulanda, den diferente categoria cu ta celebra y reconoce e trabou di varios organisacion y ser individual cu ta ehempelnan positivo denter di e comunidad Caribense Hulandes. Nominadonan a wordo nota segun votonan publico y a wordo selecta pa un cuerpo di hurado, kendenan a nomina Ira y Ayra Kip den e categoria di Arte & Literatura pa nan trabou excelente cu nan fundacion di Pancake Gallery, y como fundadornan di e programa educacional di arte internacional, Art Rules. Organisadornan di e DC Perlanan, tambe conoci como OCEAN (Overleg Orgaan Caribbische Nederlanders) ta e conseheronan operacional oficial di e Gobierno Hulandes y su ministerionan. Desde 2012, e organisacion, den colaboracion cu e ciudad di Rotterdam, ta reconociendo y promoviendo e logronan di hende y negoshi cu sea ta haci trabou cu ta un ehempel positivo, of ta dedica na e mehoracion di e comunidad Caribense Hulandes, tanto na Hulanda como na tur seis isla den e Caribe Hulandes. Riba dia 22 di Mei, Ira y Ayra a ricibi un carta oficial declarando cu nan a wordo nomina pa e premio, y invitando nan pa e gala y show principal di premiacion riba dia 14 di Juni, cu e alcalde di Rotterdam. E rumannan morocho a saca un declaracion, expresande nan honor pa cu e nominacion, y nan alegria cu loke nan a yama un nominacion inespera. Actualmente trahando duro y completamente dedica na e pre-produccion di e celebracion di 5 aña di Art Rules Aruba y e lansamento di Art Rules Curaçao, Ira y Ayra ta trahando constantemente pa lansa tur dos proyecto. “E ultimo 5 añanan aki tabata sumamente intensivo pa nos. Nos a sacrifica hopi pa realisa nos metanan y mester a pasa door di hopi bataya keto pa haci tur cos posibel. Ta tremendo pa wak con, aunke cu niun hende ta mira e lucha, nan ta reconoce e resultado”. Ira y Ayra tambe a splica cu nan ta contento pa tuma un momento pa disfruta di e frutanan di nan labor, mandando un danki grandi tambe na tur esnan cu a sostene nan. Ademas di nan nominacion den categorianan specifico, Ira y Ayra tambe ta nomina pa e premio di “Perla Mas Sobresaliente”. E premio aki ta reconocemento di e premio di Miho Perla di 2013/2014 y e publico ta invita pa vota pa e ganador. Pa vota pa Ira y Ayra, bishita http://www.dcpearls.nl/ y pa mas informacion tocante e programa di arte di Art Rules, bishita nan websitenan y paginanan social na http://www.artrulesaruba.com y http://www.artrulescuracao.com facebook @artrulesaruba @artrulescuracao twitter @artrulesU