E studiantenan di prome aña di IPA ta bay presenta un tremendo musical riba dia 16 y dia 18 di
juni 2014 di 8or te 12or di merdia na St.Theresita Center na San Nicolas.
Ta custumber cu IPA ta gradici tur scol preparatorio y basico cu a brinda e studiantenan
e oportunidad pa haci nan practica cu ta un parti obligatorio di e programa di IPA. E
gradicimento aki ta resulta tur aña den un actividad grandi riba diferente tereno bou di e nomber
IPABILIDAD.
E aña aki lo ta un poco diferente. IPA lo enfoca riba un presentacion artistico (musical), cu ta
inclui teatro, baile y musica, expresando asina un storia den forma di musical y ta hiba e nomber
IPARTE. E studiantenan mes ta crea e presentacionnan aki bao di guia di e docentenan Wilma
Kuiperie MEd. (baile) y Amy Lasten (teatro).
Riba e fechanan menciona cada scol lo tin oportunidad pa presencia un musical tocante
Sostenibilidad cu un duracion di mas o menos 1 ora. E contenido di e musical ta educativo
y ta stimula pa nos ta mas sostenibel cu naturalesa y nos manera di biba. E musical ta un
evaluacion di baile y drama di e studiantenan di prome aña. IPA ta duna hopi importancia na
e parti di Educacion di Arte ya cu esaki ta stimula creatividad, confiansa propio y ta desaroya
habilidadnan expresivo y comunicativo. Alabes Educacion di Arte ta haci posibel pa trata
temanan relevante riba bida diario.
Semper tema di musical tin di haber cu Sostenebilidad den cuido y relacion humano, desaroyo
economico pero cu cuido di medio ambiente, un actitud di participacion y ciudadania. Esaki ta
tuma luga a traves di storia y uzo di tur materia di Arte den combinacion cu entre otro materia
di Idioma, Matematica y Sciencia Social. Mester remarca cu e studiantenan ta aplica den
practica tur teoria. Alabes nan ta eherce y desaroya habilidadnan necesario pa innovacion esta
creatividad, traha hunto, desaroyo social emocional y reflexion durante e proceso pa yega na e
producto final cu ta un creacion propio. E producto final ta locual cu nan lo comparti cu tur e
muchanan presente.
Nos kier a corda e directorado di e scolnan pa inscribi prome cu dia 23 di mei via number di
fax 584-3943. Pa cualkier informacion por tuma contacto libremente cu drs. Jennifer Warner na
telefon 5243105 of na jennifer.warner@ipa.aw.
