Insel Air Aruba ta habri su di 10 vuelo directo pa Medellin


6 di juli 2015: Dialuna ultimo Aruba Airport Authority N.V. a celebra un otro

logro cu Insel Air Aruba, esta e inauguracion di e ruta Aruba-Medellin-Aruba. Esaki a sosode hunto

cu partnernan den turismo y cu e Consul di Colombia na Aruba.

Ta e intencion di e aerolinea Arubano pa habri varios otro rutanan directo pa otro ciudadnan na

Colombia, asina Tita Iglesias, Marketing Manager di Insel Air Aruba a splica. E vuelonan aki ta dirigi

na facilita e trafico entre Aruba y e pais cu tin 30% di e mercado Latino Americano den e turismo di

nos isla.

Jo-Anne Arends, Head Airline Marketing na Aruba Airport Authority N.V. a felicita Insel Air Aruba,

referiendo na e ruta nobo como un destinacion hopi importante pa Colombianonan biahando pa

Aruba pa vakantie y pa bishita famia, como tambe pa Arubianonan cu ta  bishita Medellin pa

vakantie of pa turismo medico.

Esaki ta e di 10 destinacion pa Insel Air Aruba. Siman pasa Insel Air a cuminsa cu vuelo pa San Juan,

Puerto Rico, un mercado cu a keda sin vuelo directo pa mas of menos shete aña. Pa mas di 20 aña a

maneha e mercado aki, transportando alrededor di 130 mil pasahero pa aña. San Juan ta e hub pa

transportacion aereo mas grandi den Caribe; mas di ocho miyon pasahero ta uza e aeropuerto aki

anualmente.

Actualmente, Aeropuerto Internacional Reina Beatrix di Aruba ta un di e aeropuertonan cu mas

trafico den region Caribense, cu 31 aerolinea transportando mas o menos 2.3 miyon pasahero pa

aña, principalmente for di Norte America, Sur America, Caribe y Europa. Ta remarcabel e desaroyo

di rutanan potencial nobo pa Aruba, como tambe mantencion di rutanan existente di Insel Air

Aruba.

Otro siman nos lo inaugura e vuelo pa Sint Maarten, via di Santo Domingo na Republica

Dominicana, asina Jo-Anne Arends a añadi, satisfecho cu e esfuersonan di e aerolinea y e aumento

di trafico pa Aeropuerto Internacional Reina Beatrix. El a haya e vuelo cu Insel Air Aruba pa Puerto

Rico uno excelente; unda cu tabata tuma anteriormente casi 10 ora pa yega Puerto Rico, cu e vuelo

directo, incluyendo cuminda, e ta tuma solamente un ora y mey pa yega Puerto Rico for di Aruba.

Representantenan di medionan di comunicacion di Aruba, como tambe stakeholders di AAA y Insel

Air Aruba, incluyendo representantenan di Aruba Tourism Authority (ATA) y Aruba Hotel and

Tourism Association (AHATA) tabata presente y a bay abordo di e Fokker cu capacidad pa 80

pasahero, networking y haciendo plannan, identificando y analisando partnershipnan potencial

nobo.

Insel Air Aruba ta bula dos biaha pa siman riba e ruta Aruba-Medellin-Aruba, riba dialuna y

diahuebs.

“Como aeropuerto nos ta hopi contento cu Insel Air a probecha di un otro oportunidad mas y mi ta

kere cu nan ta bay ta hopi exitoso”, asina Jo-Anne Arends a subraya.

Aruba Airport Authority ta enfocando riba planning y metanan di termino cortico y teniendo Insel

Air Aruba como un partner ta un benchmark importante pa monitor.

Concluyendo Jo-Anne Arends a splica cu tur plan pa termino cortico ta wordo desaroya paralelo na

e plannan di termino largo di Aeropuerto y ta inclui mas vuelo y miho acomodacion.