ibisa aruba

IBiSA ta organisa ‘Weganan di Rey’ diabierna awor


Cumpleaños di Su Mahestad Rey Willem Alexander ta wordo celebra e aña aki un biaha mas den forma di weganan pa muchanan. E fecha e aña aki ta cay den fin di siman y tambe net den e siman di vacacion escolar. Pero apesar di esaki e comision organisador den Reino a stipula e fecha di 25 di april 2014 cu ta diabierna e siman aki, pa e celebracion tuma lugar. Instituto Biba Saludabel y Activo, IBiSA ta encarga cu e celebracion di ‘Weganan di Rey 2014’ cu ta tuma lugar na 3 localidad pa di e forma aki duna oportunidad na mas tanto mucha posibel pa participa y celebra. Lugar di Actividad: Na San Nicolas e celebracion di ‘Weganan di Rey’ ta tuma lugar na IBiSA Sport Centrum situa na Dr. Schaepmanstraat 52. Prome instante a scoge pa Carnival Village, pero mirando cu tin construccion tumando lugar na e sitio a dicidi pa move bay IBiSA Sport Centrum. Otro localidadnan ta na Parke Curason Jaburibari y Plaza Turismo Linear Park. E actividadnan riba diabierna ta cuminsa pa 8’or di mainta y ta caba pa 12’or di merdia. E mainta ta inicia cu un desayuno saludabel pa tur mucha, sigui pa actividadnan deportivo, baile y musica. Participacion ta gratis pa muchanan entre 6 y 12 aña di edad pero ta necesario pa inscribi nomber di e muchanan cu ta participa y tambe na cua di e localidadnan. E cantidad di lugarnan ta limita, pa cual ta pidi mayor pa inscribi nomber di nan yiunan mas pronto cu ta posibel. Por inscribi via ibisa.socialmedia@gmail.com of tambe personalmente na oficina di IBiSA situa na Frankrijkstraat 1 of IBiSA Sport Centrum San Nicolaas Dr. Schaepmanstraat 52. Pa mas informacion por subi riba Facebook di IBiSA of riba website: www.ibisaruba.org of yama na telefoon 582 4987.