Un gran parti di e delegadonan cu a yega Aruba siman pasa pa
asisti na e conferencia anual di YMCA-LACA, pa e “Reunion Presencial de Comite Ehecutivo Aruba 2015”
a yega hunto pa despedi, pa yama Danki na e comision di Aruba pa nan hospitalidad y estadia
placentero. Nan ta mira atras riba reunionnan fructifero, yena di ideanan nobo y innovativo, na
beneficio di e muchanan y hobennan di Latino America y Caribe
Director di YMCA Aruba, Nathalie Harms y secretaria di YMCA-LACA, esta Anky Vrolijk, a ricibi e
regalonan simbolisando artesanianan di cada pais y tambe a ricibi un trofeo di Latin America and
Caribbean Alliance of YMCA na unda ta bisa “In appreciation of their humble and dedicated service
hosting and organizing the 20th Annual Conference and meeting of the Excecutive Committee” for di
man di Mihoru Roberto Kobayashi, Presidente di YMCA-LACA.
“Nos ta bisa humilde, ya cu ta humildad nos a conoce como e miho ingrediente di e pais Aruba. Nos ta
keda cu un recuerdo agradabel y pa semper di e pais aki y su hendenan. Pa di 11 biaha cu mi ta
presencia un conferencia anual di LACA y esaki ta loke mi ta hiba e biaha aki cumi. Un pais chikito
humilde pero di curason masha grandi”, asina Mihoru Roberto Kobayashi a relata como despedida.
“Despues di a presencia un video cu a compila tur momentonan cu e delegacionnan a presencia na
Aruba, tin cu bisa cu e isla aki ta grandi den su metanan y nos por siña masha hopi mes di e trabao
incansabel di YMCA Aruba y su boluntarionan, pa duna guia na tur e hobennan, adulto y e famia di
Aruba”, segun Antonio Merino, Secretario General LACA a relata.
E conferencia LACA 2015, a trece hunto delegadonan di Panama, 29 participante di Brazil cu tabata esun
di mas grandi , Honduras, Cayman Islands, Chile, Colombia, Ecuador, Haiti, Mexico, Nicaragua, Panama,
Peru, Trinidad and Tobago, Uruguay, Canada, Merca, Alemania y Spaña hunto, pa studia cambionan
proponi pa yega na un miho YMCA.
“YMCA Aruba como organisadonan ta orguyoso di por tabata anfitrion di tur e boluntarionan di hopi
pais di mundo y a siña masha hopi mes for di cada un di nan. Awor cu nos conoce e mesun
preocupacionnan cu cada pais ta pasa aden cu e hubentud actual y nan ponencianan, nos sa cu hunto
nos por soluciona mucho mas”, di acuerdo cu Anky Vrolijk di YMCA Aruba.
“Esaki ta pone un bes mas e luz positivo riba trabao boluntario, na unda bo ta dedica na bo pais y su
hendenan pa construi un miho base y aporta na felicidad humano. E trabao di boluntario ta keda
demostra aki un biaha mas como algo special significativo y poderoso pa e superacion di un pais”, asina
Anky Vrolijk a sigui bisa mientras e ta sigui ricibi palabranan y gestonan di cariño y aprecio for di e
delegadonan.
