Pic  Fit Teens 4

Hobennan ta sigui e proyecto piloto di Fit Teens na Colegio Arubano


E proyecto piloto pa alumnonan di Ciclo Basico na Colegio Arubano Oranjestad, esta “Fit Teens” ya caba ta den su di 8 siman. Instituto Biba Saludabel y Activo, IBiSA y Departamento di Salud su seccion ‘Cuido di Salud Hubenil’ ta encarga cu e programa cu ta tuma lugar tur diaranson merdia for di 2’or pa 4’or di atardi. Den e simannan cu a transcuri, Joel Martijn, Lifestyle Coach di IBiSA y Ebrina Curet, nutricionista/dietista na Cuido di Salud Hubenil a traha cu e hobennan cu ta participa na e programa. Un promedio di 14 hoben tey presente na e lesnan y ta sigui presentacion di diferente topico, entre otro: ‘Guia pa un Bida Saludabel’, ‘Energia y Balans’, ‘Peso Saludabel’, ‘Lesa etiketa di cuminda’etc. Cu hopi interes e hobennan ta atende tambe e lesnan ‘Con pa cushina saludabel y tur tecnica rond di e preparacionnan’. Pa e lesnan di cushinamento ta haci uzo di e cushina di “The Healthy Way”. E parti di movecion tambe ta hopi importante y e hobennan ta haya instruccion tur siman riba temanan di ‘Team building’, ‘Fun y Fitness games’. Nan a haci un ‘fitness test’ riba e prome dia di les y dia 16 di april ultimo a haci un di dos, mientras cu riba e ultimo dia di les lo haci e mesun ‘fitness test’ pa mira nan desaroyo y eventual progreso. Cu e test aki, ta midi con nan condicion fisico a mehora. Cada siman e hobennan ta haya guia riba diferente area, con pa siña identifica, monitorea, analisa y pone meta, pa nan mes por traha y drecha nan salud, cu e meta pa nan por biba un bida mas saludabel y activo. E instruccionnan cu e hobennan ta haya ta di importancia pa motibo cu esaki ta siña nan con pa logra nan metanan. Banda di e actividadnan aki, e hobennan ta trahando riba un competencia di poster. Cu hopi interes nan ta preparando un poster cu lo tin cu sirbi pa promove cuminda y cos di bebe saludabel na e cantina di nan school mes. E reaccion di e hobennan participando na e proyecto piloto di “Fit Teens” ta tremendo y tanto IBiSA como Departamento di Salud ta hopi contento cu e hobennan ta haci nan best pa atende tur les y ta mira cu nan ta participa cu hopi entusiasmo. Cu e proyecto piloto di “Fit Teens”, e meta ta pa conscientisa hobennan riba nan calidad di bida. Traha, mehora y mantene nan estilo di biba, come saludabel y cumpli cu e normanan di haci movecion minimo 60 minuut tur dia. E ultimo dia di les pa e hobennan lo ta dia 4 di juni 2014. IBiSA y Departamento di Salud ta gradici Colegio Arubano Oranjestad pa nan aporte grandi na e proyecto piloto di “Fit Teens”.

Leave a Comment