logo sticht grupo carn

GRUPO UNI TA INFORMA : PAKIKO E DANCE PARADE A WORDO CANCELA


Grupo Uni di Carnaval for di inicio di e temporada di Carnaval 61 a propaganda e parada Nobo dedica na hobenan cu ta “ dance parade” cu tabata programa pa 30 di Januari 2015. Gruponan a inicia cu inscribcion y aki a mira e bon reaccion pero nunca a para keto pa pone un limite di edad. E motibo di e cancelacion tabata exactamente cu e gran mayoria di e participantenan cu a cumpra ticket tabata hobennan menor di edad bao di 13 anja. Como personan responsabel cada lider di grupo a bay den seno y delibera ariba e posibel consecuencianan cu lo por tin durante di e parade aki, specialmente cu ta trata di un evento cu openbar y cu esaki no ta responsonsabel pa hobennan di edad abou participa. Tanto e sponsor Polar como Gruponan uni a reuni Diahuebs anochi y tambe Diabierna mainta pa discuti riba e diferente alternativanan cu tabata tin pa controla e hobennan. Ora a haci e evaluacion a constata cu ta trata di mas cu 500 hoben bou di edad di 14 anja cu a cumpra un ticket y cu e control no tabata asina facil, esei a haci cu a opta pa cancela e evento. Gruponan Uni ta conciente cu na cuminsamento nan no a pone un limite di edad y a laga esaki habri pa tur hende participa. Loke no a spera ta cu un mucha di 12 pa 13 anja lo tabata tin 95 florin pa cumpra un ticket na e balor ey. Mas ainda Gruponan Uni ta conciente cu si a laga e evento bai door cu tur e hobennan aki, nan lo tabata blanco di critica pa e mesun mayor di e hobennan cu a participa na e evento aki. Tanto Gruponan Uni como tambe e sponsor Polar a confirma cu otro anja e evento aki lo tey un biaha mas, pero e biaha aki ta pone un edad minimo di 16 anja pariba. Na mes momento Gruponan Uni kier a concientisa mayor pa cuida nan yiunan y no laganan nan so den e temporada aki. Na tur persona cu a cumpra nan ticket por busca esaki na Hamaka Sidewalk Café awe tardi entre 5 pa 8 or, ora cu nan entrega nan tshirt of nan ticket bek.

Leave a Comment