Fundacion CINEARUBA cu un otro nochi di pelicula gratis
Diahuebs prome di augustus fundacion CINEARUBA ta presenta un biaha mas nochi di pelicula gratis. E biaha aki lo tin presentacion di un comedia Argentino titula ‘Re Loca.’ E luga ta keda mescos, cu ta Ateliers ’89 situa na Dominicanessenstraat 34, schuin tegenover di Maria College Mavo na Playa. Porta ta habri 7:30 PM y e pelicula ta cuminsa 8’or di anochi.
E nochi lo inicia cu CINEARUBA su programa di Shortcutz Aruba y e siman aki lo tin presentacion di un otro pelicula cortico local dirigi pa Ronney Dotel titula ‘Time Frame.’ E pelicula tabata parti di e proyecto di 48 ora Bonaire cu por cierto e aña aki Aruba lo tin su propio version. E inscripcion pa participa na 48hfp Aruba a habri caba y tin gruponan cu ya caba a registra. E competencia lo ta den e prome fin di siman di october e aña aki. E pelicula cortico ‘Time Frame’ a gana varios premionan entre otro miho director, miho actor, miho cinematografia y miho sound design. Publico lo tin e oportunidad pa wak e pelicula ‘Time Frame’ y tambe lo bay splica mas tocante e competencia di 48 ora Aruba.
E entrada ta completamente gratis pa e nochi di pelicula di e siman aki. E actividad aki ta wordo haci specialmente pa e temporada di augustus y ta conta cu e apoyo di Ateliers ’89 y Playa Liquor & Bottling Company NV. Mas informacion di e actividad aki y di tur CINEARUBA su actividadnan, por hayanan riba nos pagina di Facebook cu ta wwwfacebook.com/cinearuba.
