Fecha di rifa Facultad di Arte y Ciencia (FAS) a ser posponi pa 2 di october 2019

E Faculta di Arte y Ciencia (FAS) di Universidad di Aruba (UA) ta corda pueblo di Aruba cu e studiantenan ta bende rifa pa yuda cubri gasto di un biahe educacional na october proximo.  E meta di e rifa ta pa e studiantenan por colecta fondo pa paga nan ticket, estadia y transporte. Ta pidi tur comerciante y e comunidad henter pa coopera ya cu di e forma aki studiantenan ta haya e oportunidad pa amplia nan experiencia y conocemento riba nivel practico/internacional. E programa practico/internacional ta pa studiantenan di Social Work and Development (SW&D) y e studiantenan di e programa di estudio Organization, Governance, and Management (OGM). E studiantenan di SW&D ta biaha pa Costa Rica y OGM ta biaha pa Washington DC. E meta di e biahenan aki ta pa stimula e studiantenan pa aspira pa sigui studia (pa un Masters), pa haya experiencia internacional, pa amplia nan perspectiva teorético y pa nan experiencia con ta aplica y teorianan cu nan ta studia den e cursonan por medio di diferente proyecto cu lo bishita na e destinacionnan ya mencionia. E studiantenan y docentenan di FAS ta gradici tur comerciante cu ta coopera y alerta e comunidad cu e dia di e rifa lo ta 2 di october proximo. Pa mas informacion por e-mail yolanda.richardson@ua.aw, valerie.maduro@ua.aw of nurianne.helder@ua.aw.