Exposicion di arte na biblioteca “MI ARTE MI PASION II”

Den sala di exposicion di diamars 11 di November pa diabierna 21 di November tin un exposicion special, habri pa un y tur. Esaki ta e di dos exposicion solo di artista local sra. Imelda de Cuba- Henriquez. E prome tabata na Maart 2007. Sra. Imelda de Cuba ta pintor y ilustrador. Den pasado sra. Imelda tabata produci e revista pa mucha, Matinette y tambe e revista Chabalito. “E prome tabata tin 50 obra di oleo y pastelkrijt. E biaha aki mi tin 35 obra, tur Oleo riba canvas y plywood fura cu canvas. Mayoria ta bistanan y/o casnan na Aruba. Entro otro mi tin e biaha aki casnan di cunucu, residencianan den nan tempo di gloria, edificionan cu no ta existi mas, potretnan y diferente otro tema. E obranan ta varia den tamaño, di chikito di 8 x 12 inch te obra grandi di 24 x 54 inch. Mi ta gusta pinta edificionan cu a bay perdi y cu mi ta corda nan detayenan ainda di tempo mi tabata mucha y cu yudansa tambe di portretnan obteni di famianan. Esaki mi ta haci pasobra ta parti di nos historia y ta bon pa e generacionnan di awor y esnan cu lo bin ainda. E biaha aki atrobe tin algun obra cu ta ilustra nos pasado”. “Mi hobby semper tabata pintamento. Pero como mucha, adolecente y adulto hoben, mi tabata tin otro interes den bida y masha poco tempo. Tog mi a produci algun cuadra. Awor como adulto mayor mi tin mucho mas tempo pa dedica na mi arte cu ta mi pasion. Cualkier obheto, sea hende, mata of flor, bestia, paisahe, edificio por inspira mi. Hopi biaha mi ta haci un combinacion di esakinan pa crea un escena tipico. Mi ta gusta obhetonan cu hopi detaye. Mi ta un pintor realistico y masha detayista. For di aña 2003 mi a tuma pintamento na serio. E expocision ta habri di 11 di November te cu dia 21 di November 2014 y por bishita esaki durante orario di biblioteca na Playa. Tuma nota cu dialuna, diaranson y diabierna biblioteca ta habri te anochi 8 or. Un y tur ta bonbini.