rapport

Entregamento di rapport Youth Health Survey 2013


Na Departamento di Salud Publico Aruba (DESPA), den presencia di Management Team, seccion Epidemiologia y Investigacion, seccion Malesanan Contagioso y seccion Promocion di Salud a tuma luga e entregamento oficial di e rapport Youth Health Survey Aruba 2012. E rapport aki ta un fruto di labor bou guia di seccion Epidemiologia y Investigacion di DESPA. Ta prome biaha cu Aruba ta dispone di datonan relevante encuanto salud di nos hobennan aki na Aruba. E datonan aki por wordo compara cu otro paisnan mundialmente. Den e rapport tin compila dato y descripcion con nos hubentud, entre 12 pa 19 aña na Aruba, ta pensa y nan comportacion den relacion cu nan salud. Tin relato di nos hobennan relaciona cu nan estilo di bida, comportacion di riesgo di salud, salud sexual y reproductivo, pero tambe nan descripcion di nan ambiente na cas, scol, comunidad, amigo . Atencion tambe a bay na e factor di salud mental y salud fisico. Un danki ta bay na prome luga Union Europeo cu a financia e investigacion y a percura pa e imprenta di e rapport. Tambe PAHO (Pan American Health Organization) a duna ayudo tecnico. Nos ministernan anterior y actual di Salud Publico y di Enseñansa, Departamento di Enseñansa, CBS y e encuestadonan a haci cu e investigacion aki tabata exitoso te resulta den un rapport. Cu cooperacion di personal di e diferente seccionnan di DESPA, mayornan y e hobennan cu a participa na e investigacion, directiva y docentenan di e scolnan secundario a duna como resultado cu un rapport representativo di nos hubentud awo ta disponibel.  E rapport ta duna un bon bista con nos hubentud na Aruba ta riba diferente tereno p.e. salud, educacion pero e parti social tambe ta wordo treci dilanti. E intencion di e rapport aki ta pa e wordo uza door di diferente departamento, organisacionnan cu ta traha cu hobennan na Aruba. Di e forma aki por traha miho maneho na bienestar, mehoracion di salud y proteccion di nos hobennan. Pa mas informacion por tuma contacto cu Departamento di Salud Publico, seccion Epidemiologia y Investigacion na 522-4200.