Empleadonan di IBiSA ta ricibi reconocimento special


En conexion cu e bishita di Pareha Real na november 2013 y specificamente pa e

organisacion y ehecucion di e “Royal Jump up”, den cual Instituto Biba Saludabel

y Activo, IBiSA a hunga un rol importante, algun empleado di IBiSA a ricibi un

reconocimento special diabierna atardi riba Wilhelmina Park. Nos por corda cu e “Royal

Jump up” a tuma lugar den Compleho Deportivo Guillermo Prospero Trinidad, e laman

blauw di muchanan di Schoolnan Basico di Aruba den nan flannel blauw cu e Shoco dia

21 di November 2013.

E reconocimento special aki pa medio di un ‘Medaya Conmemorativo’ a ser entrega

door di Su Excelencia Gobernador di Aruba sr. Fredis Refunjol y Prome Minister mr.

Mike Eman den nomber di Cas Real.

Despues di e bishita Real na e parti Caribe Hulandes, Rey Willem Alexander y Reina

Maxima a keda sumamente impresiona y contento cu e actividadnan cu a ser prepara

pa nan durante nan bishita na Aruba aña pasa, pa cual motibo a selecta for di mas cu

500 boluntario, e cantidad di 77 persona pa duna un reconocimento special.

E acto cu a tuma lugar riba Wilhelmina Park a encera un programa cu Kabinete di

Gobernador di Aruba a prepara pa e ocasion. Despues di e yegada di Su Excelencia

Gobernador Refunjol pa 5’or di atardi, a sigui cu un discurso elocuente di su excelencia

sr. Gobernador, cu a repasa cada actividad y menciona e personanan cu a ricibi e

reconocimento pa nan trabao. Despues a sigui cu e parti di entrega di e medayanan di

reconocimento. E prome grupo pa ricibi esaki tabata e grupo di 80 militar di Cuerpo di

Marina Real di Aruba.

Siguientemente a parti e grupo di 77 ciudadano den dos. Y un parti a ricibi nan medaya

for di sr. Gobernador Refunjol, mientras cu e otro parti a haya esaki for di Prome

Minister sr. Eman.

E grupo den cual e empleadonan di IBiSA tabata a ricibi nan medaya conmemorativo

for di su Excelencia sr. Gobernador Refunjol. Esnan cu a ricibi e reconocimento special

y cu a forma parti di e “Shoco Team” ta: Edgar Erasmus, Adeline Geerman, Sue-Ann

de Leça-Leong, Monique van Embden, Patty Portier, Rodymar Geerman, Annemarie

Proveyer-Groot, Esmeralda Schotman, Omar Harms, Giovanni Raghunath, Teiry

Peñate, Angelique Thode, Richard Tromp, Zulema Dabian-Erasmus, Nathalie Maduro,

Di-Angelo Schenker, Addonsito Croes, Giovanni Leocadia y Ericko Pieternella. Tur bao

guia di sra. Margot Llomphart di Kabinet di Gobernador di Aruba.

E atardi a conta cu un presentacion bunita di e grupo di baile di Alydia Wever y despues

di e entrega di e ‘Medaya Conmemorativo’, a clausura cu e presentacion di e grupo

Datapanik cu a deleita esnan presente musicalmente.

Direktie y Personal di IBiSA ta felicita tur persona cu a yuda, no solamente esnan cu

a ricibi e ‘Medaya Conmemorativo di Cas Real’, pero tur hende. Mas ainda esnan cu

a yuda sin cu nan mes tabata tin oportunidad pa wak e Rey cu e Reina, den cual ta

conta e mas di 100 boluntario cu a asisti e empleadonan di IBiSA den organisa, prepara

y ehecuta e tremendo actividad di e “Royal Jump up” cu sigur ta keda den memoria y

curason di Pareha Real.