E aña aki Art Rules ta celebra 5 aña. Cu maestronan viahando for di rond di mundo pa duna les di arte den varios disciplina, Art Rules a inspira y motiva mas di 700 hoben aspirante desde su lansamento na 2010. Ademas di e lustro di 5 aña, e fundadornan di Art Rules awo ta expandiendo e programa pa bai Corsow.
Debi na e expansion di produccion di Art Rules entre 2 isla, e fundadornan a scohe pa ofrece Aruba 7 en bes di e 9 disciplinanan di arte cu awo ta wordo ofreci den e programa.
Aunke cu Rap & Poesia tabata un di e lesnan cu nan no tabatin planea pa ofrece e aña aki, e fundadornan a haya nan mes forsa pa reintroduci e klas aki debi na e demanda halto di esnan aplicando y pidiendo pa trece e klas aki bek. Rap & Poesia ta e unico tayer di Art Rules cu ta enfoca riba skirbimento y poesia, y e ta sumamente popular bou di e hobennan. Reintroduci bou di su nomber Art Rules Skirbimento Creativo & Poesia, e tayer ta diseña pa siña studiantenan maneranan creativo di organisa nan pensamento, imaginacion y inspiracion pa asina transforma esakinan den obranan skirbi.
Studiantenan lo ricibi sesionnan introductorio interactivo di poesia, ficcion (storianan cortico), skirbimento di cantica y skirbimento di obranan teatral. E tayer tambe ta inclui bishitanan pa compone obranan den diferente aimbiente como tambe un anochi di open-mic, unda studiantenan ta invita pa presenta e piesanan di nan escohencia.
E maestro di e tayer ta e artista Arubiano Rosabelle Illes, kende ta formando parti di e programa pa e di dos biaha. Rosabelle Illes ta e autor di dos coleccion di poesia, esta “Beyond Insanity” (2005) y “Spiel di mi Alma” (2010) y ta e creador di un kalender di arte titula “Wholism” (2012).Den transcurso di su carera literario, Rosabelle a presenta y exhibit su obranan na Aruba, Corsow, Boneiro, Grenada y Hulanda. Actualmente Rosabelle ta trahando riba un buki di mucha den colaboracion cu e cantante-escritor di cancion Curasoleño Levi Silvanie, kende por cierto tambe lo fungi como e maestro di Art Rules 2014 Musica & Presentacion. Rosabelle tin un BA den Psicologia cu un minor den Ingles for di Webster University y un MSc. den Psicologia Social y Organisatorio for di e Universidad di Leiden, unda actualmente e ta un candidata doctoral den psicologia.
Presenta pa RBC Royal Bank, Art Rules Aruba ta cuminsa riba dia 5 di Juli y lo tuma luga durante 2 siman cu un presentacion final riba dia 18 di Juli na Cas Di Cultura. Espacionan limita ta obtenibel ainda pa Art Rules Skirbimento Creativo & Poesia. Ofreci na esnan entre 16-26 aña, for di 10’or di mainta pa 4’or di atardi tur dia. Interesa pa participa den e programa? Registra awo ora bo bishita e website na www.artrulesaruba.com/apply
Pa mas informacion riba TUR e maestronan, tayernan e ultimo desaroyonan, noticia y mas, bishita www.artrulesaruba.com of Art Rules riba nan plataformanan social via www.facebook.com/artrulesaruba @twitter/artrulesU Instagram@Artrulesflicks
