E mentalista, ilusionista y artista Guy Bavli lo ta na Aruba pa presenta un show den e Alhambra Ballroom riba dianan 3, 4 y 5 di Juli, hibando e publico riba un aventura den e misterionan di e mente humano. E anochi na Alhambra Ballroom lo ta yena cu wega mental y humor, demostrando Guy su podernan scondi, cualnan ta bai contra logica y sciencia, ya cu su podernan telekinetico por move obhetonan sin e uso di cualkier toke fisico.
Harimento ta un tremendo medicina, Guy ta bisa, y mi publiconan interactivo ta hari y sacudi nan cabes ora nan no por kere con mi ta lesa nan mente cu un mescla di mentalismo y ilusion, psicologia, fisiologia y intuicion cu ta entretenimento puro.
Naci na Tel-Aviv, Israel, Guy a cuminsa duna show dilanti di publiconan en bibo na e edad di cinco aña. Ora e tabatin ocho aña, el a duna su prome presentacion profesional na un club di landamento na Tel-Aviv, y esaki tabata su prome presentacion paga. Desde e dia aki e no a baha mas di e scenario.
Carchinan pa Guy su tres presentacionnan na Aruba ta obtenibel na Alhambra Ballroom, y e cahera di Alhambra Casino. Portanan ta habri pa 7:30pm, y e show ta cuminsa pa 8pm. Bo ta wordo conseha pa laga bo logica na e porta, segun Guy, y explora e posibilidad di e mente humano hunto cu mi.
Guy, kende a yega di bishita Aruba varios biaha, incluyendo pa duna presentacionnan priva, ta amigo di ehecutivonan di Divi Resorts Alex Nieumeyer, Tabitha Fecunda y Marin Bijl, y e por ser mira akinan na Fusion, unda el a ofrece un fiesta di cocktail cu miembronan di prensa local.
