FRANS BAUER MET ALEX NIEUWMEYER EN GERRIT GRIFFITH -DIVI ARUBA PHOENIX-27072014-1022

E famoso cantante Hulandes y personalidad di television Frans Bauer ta disfrutando di un vakantie na Aruba, na Divi Resorts


Frans Bauer, procedente di Roosendaal, na Hulanda, ta un cantante Hulandes popular, conoci pa su levenslied, cu letranan y un melodia cu ta sali directamente di su curason. Lantando den un ambiente sumamente simpel y humilde, Bauer su aspiracionnan for di un edad hoben tabata pa haci algo mas cu su bida y bira un cantante. Inspira pa Julio Iglesias, Elvis Presley y Koos Alberts, un otro streya Hulandes, Bauer a logra di lansa su carera na 1987 ora el a graba su prome single: Ben Je Jong? E productornan Hulandes Rudi Schreijenberg y Emile Hartkamp a dun’e un man cu e aspectonan tecnico di e produccion, y e resto ta historia! Bauer a logra fama local, sigui pa fama nacional, participando den e programa popular di television All You Need Is love na cuminsamento di 1992, unda e mester a scohe dos fanatico femenino pa sali riba un “date” cune. Na 1994 el a logra su prome hit nacional cu e cantica romantico Als Sterren Aan De Hemel Staan, y na 1997 el a domina Alemania cu su album Weil Ich Dich Liebe, cual traduci ta nifica Paso Mi Ta Stima Bo. Frans Bauer su fama a sigui crece te e momento cu el a haya su mesun show di realidad, titula De Bauers, den cual su bida diario, incluyendo su bida di famia cu su casa Mariska van Rossenberg, a wordo filma. Bauer tambe ta diseña un liña di paña pa e cadena di tienda di Vroom & Dreesmann cu ta basa na Hulanda. Bauer, kende por ser mira riba e portretnan hunto cu top gerencia di Divi Resort, Alex Nieuwmeyer y Gerrit Griffith, a gana varios premio y honor, incluyendo e titulo di Ridder in de Orde van Oranje-Nassau, danki na su trabou caritativo, y e Gouden Televizier-Ring, pa su show di realidad cu pa varios aña a wordo transmiti via television na Hulanda.