E di 5 edicion ‘12 Hours of Aruba’ lo campaña pa Road Safety & Sharing


Oranjestad – Inscripcion pa e di 5 edicion di e evento ciclistico di mountainbike ‘12 Hours of Aruba’ ta habri. E magno evento lo bay tuma luga diasabra 13 di april y lo tin dos elemento nobo y un otro meta. Ciclistanan cu ta participa na e evento di relevo aki – incluyendo muchanan cu pa promer biaha por participa – tambe lo ta contribuyendo na e campaña Road Safety & Sharing cu e tema ‘Safe a Life, watch where you drive’.  

FX Sports bike team ta organisando e ‘12 Hours of Aruba’ desde 2015. Durante e ultimo 4 eventonan (2015, 2016, 2017 y 2018) por a core unicamente na e ‘12 Hours of Aruba’. Riba peticion di hopi coredo nan, e decision a wordo tuma pa e aña aki cu bin cu edicion mas cortico pues ‘6 Hours of Aruba’. E sitio y distancia cu lo mester wordo cori ta keda mescos: ta trata aki di un ruta/distancia di aproximadamente 4km di becindario di kapel di Alto Vista.  

NO CORE MADRUGA

Nobo e aña aki ta cu e participantenan lo no bai core den oranan di madruga. E ‘12 Hours of Aruba’ lo cuminsa diasabra pa 12:00 pm (12 or di merdia). E careda di ‘6 Hours of Aruba’ lo cuminsa pa 6:00 pm (6 or di atardi). Ambos evento (12H & 6H) lo termina pa mey anochi, y organisadornan conta riba un Dobbel Sprint Finish entre e ekiponan cu ta retando otro.

Organisador Edwin Hekman: “Durante e eventonan di añanan anterior, e competencia mes tawata entre 6:00 PM di diasabra atardi te cu 6:00 AM di diadomingo mainta di e siguiente dia. Esaki a trece cune un bon competencia na final pa e ekiponan. Pero pa loke ta e orario di madruga pa mainta, esaki ta atrae poco publico.” Organisadornan a tuma nota di presencia di un bon publico durante oranan di anochi, pero ya den oranan di madruga esaki a bira menos. “Cu e actual cambio di cuminsa durante dia y caba mey anochi, nos ta spera cu esaki lo atrae un publico mucho mas grandi caminda lo por sera e evento aki den un forma festivo”, segun Hekman.

‘KIDS 12 HOURS OF ARUBA’

Hubada Cycling Team, colaborando cu 12 Hours of Aruba, a tuma na nan encargo e aña aki pa organiza un ‘Kids 12 Hours of Aruba’. Esaki ta un careda pa muchanan cuminsando for di 11 aña (naci na 2008). Nan lo core un ruta mas cortico y mas facil di 1 kilometer den e mesun bisindario di kapel. Nan lo haña 3 ora pa core mas tanto buelta posibel den ekipo. E evento aki lo cuminsa diasabra pa 07:30 AM. Coredo nan entre 11 y 12 aña ta wordo permiti pa core unicamente den ekipo di 4 coredo. Coredo nan entre 13 y 14 aña si ta wordo permiti pa core den ekipo di 2 of 4 coredo.




Leave a Comment