Un encuentro a tuma luga recienemente pa chefnan, profesionalnan di cuminda y bebida y importadornan, pa asina lansa di nobo e Aruba Culinary Association, cual tabata inactivo durante e ultimo añanan aki. E prome reunion habri pa miembronan potencial a tuma luga riba dia 27 di Oktober na Renaissance Convention Center unda e asociacion a formula su mision y vision. E di dos reunion habri, un evento VIP di networking, a tuma luga den e ballroom di Ritz Carlton riba dia 3 di November, cu catering elegante di Les Crustaces restaurant, publicamente revelando e personalidadnan tras di e asociacion, y nan plannan pa e futuro.
Eric Sywak di Frasa International Trading a introduci Urvin Croes, chef y propietario di White Modern Cuisine y Stephen Toevs, Chef Ehecutivo di Ritz Carlton, kende a yama bon bini na e invitadonan, re-iterando nan compromiso na excelencia culinario y nan promesa pa mehora e experiencia di come na Aruba, ademas di fomenta e desaroyo personal di studiantenan culinario y chefnan profesional.
Manera declara den un carta cu a wordo circula entre gerentenan general y directornan di cuminda y bebida, e asociacion ta lucha pa logra un fama internacionalmente conoci, permitiendo Aruba di tin un impression mas grandi riba mundo via un renacemento culinario cu ta sigui crece, promoviendo e isla su reputacion como un Mecca di delicia culinario via media social y mustrando e publico general y tur miembro potencial cu tin un oportunidad autentico pa sigui un carera culinario na Aruba.
E asociacion tambe a pone como un meta pa ofrece educacion di industria via varios sesion di entrenamento, newsletter, evento di networking, competencia, reunion di miembro y seminario, ofreciendo miembronan e oportunidad pa conoce coleganan alia den e insutria y top chefnan acredita, cual un persona cu ta drentando e industria kisas no lo por a logra sin e asistencia di e club.
E Aruba Culinary Association ta determina pa yuda su miembronan door di crea un plan di desaroyo profesional cu ta ofrece oportunidadnan mas amplio pa empleo, desaroyo di talento, interaccion entre coleganan y conocemento di e industria culinario y industria di hospitalidad, asina tambe birando un fuente pa academia local y profesionalnan di e industria pa desaroya ideanan, tendencianan y proceduranan cu ta tene miembronan di ACA na e top di e industria. Finalmente, nan lo traha pa aumenta e esfuersonan individual di operadornan pa haci standardnan di seguridad di sanitacion e factor principal tras di tur aspecto di bida culinario.
Riba nos portretnan por mira algun momento di e evento VIP di networking na Ritz Carlton. Bo por tuma contacto cu e asociacion via Facebook of via su Presidente, Chef Urvin Croes na Urvin@whitecuisine.com. Otro persona di contacto ta inclui: e.sywak@frasaaruba.com, Stephen.Toevs@ritzcarlton.com.
