E temporada di fin di aña ocupa cu celebracion y hopi comemento a keda’tras. Aña 2015
a habri cu hopi reto pa nos atleta y deportistanan. Thrill Walkers S.V. den su afan pa sigui
contribui na un Aruba den movecion y mas saludabel ta organisa su prome gran actividad
pa aña 2015. E evento aki ta uno cu Team Thrill Walkers a bin ta organisa pa 6 aña caba
y ta asina popular y ta conta cu un participacion masha grandi mes di persona interesa y
comprometi pa cuminsa move, ehercita y traha riba mehoracion di nan condicion y salud.
United 5.5K Walk & Run” ta tuma lugar diadomingo dia 11 di januari 2015 y ta sali
exactamente pa 5:30p.m. for di e caminda dilanti di Club di Sport Boys na Angochi.
Ya for di 4:00p.m. por cuminsa registra participacion of cumpra ticket ainda pa bo participa.
Ruta di United 5.5K Walk & Run:
Salida ta for di e caminda dilanti di Club di Sport Boys na Angochi bin abou na e caminda-T
Angochi 8C, ta bira na man robes bay direccion zuid. Aki ta yega otro caminda-T di Sombre
20B y ta bira na man drechi bin abou riba e caminda y ta sigui te na e cruzada di caminda di
Kas Ariba 43, na altura di e dam di Kas Ariba. Despues ta bira na man drechi sigui direccion
noord riba caminda di Ser’i Compa pa Kadushi Largo. Ta yega e cruzada di caminda di
Kadushi Largo y ta bira na man drechi subi e caminda di Kadushi Largo sigui bay ariba full
pasa den Angochi y yega na otro cruzada di Sabanilla Abao cu Angochi. Na Angochi 28
ta bira na man drechi un biaha mas y ta keda riba e caminda di Coba Lodo bin zuid te na e
caminda-T di Coba Lodo 18 (Felis Ras). Despues ta bira na man drechi y bin abou riba e
caminda di Sombre te bolbe yega e caminda-T Sombre 20B, aki ta bira bek na man drechi y
bin direccion noord pa finalisa mes caminda cu a cuminsa dilanti di Club di Sport Boys.
Riba ruta lo tin ‘waterpost’ pa asisti tur participante, como tambe na final ta ricibi awa, fruta
y hopi premio interesante manera tur aña, danki na nos patrosinadornan. E aña aki tambe
Thrill Walkers S.V. tin premio pa e prome 3 coredonan y e prome 3 canadonan masculino y
femenino cu cruza e linea final.
Participacion ta solamente 5 florin pa persona y e prome actividad aki di careda y caminata
pa aña 2015 sigur ta un bon momento pa cuminsa fija metanan pa cumpli cu nan durante aña.
Esaki ta Thrill Walkers S.V. su prome gran actividad pa aña 2015, cu sigur un biaha mas
ta bira otro aña grandi pa e organisacion cu tin como meta pa promove movecion: “Move
pa Salud” . Durante aña tin plannan grandi pa sigui cumpli cun’e pa loke ta actividad di
Thrill Walkers ta hasi uzo di e oportunidad pa invita henter Pueblo di Aruba, su miembronan,
deportista y atletanan pa bin participa grandemente diadomingo atardi na Angochi na e
“United 5.5K Walk & Run”.
Na comienso di e aña nobo Thrill Walkers S.V. ta desea tur miembro, deportista, atletanan y
Aruba en general un aña productivo y positivo. Cu tur meta y deseo keda realisa pa hunto nos
yega na un Aruba Salud pa un y tur.
